Festa di Santa Lucia a Sarausa

Dâ Wikipedia, la nciclupidìa lìbbira.
Jump to navigation Jump to search

La festa di Santa Lucia a Sarausa veni fatta dui voti a l'annu, lu 13 di dicèmmiru e la prima duminicadìa di maggiu: a dicèmmiru veni cilibbrata la morti di Lucia, vèrgini e màrtiri sarausana, ca murìu nti l'annu 304 d.c., mentri ca a maggiu veni cilibbrata Santa Lucia di li Quagghi, p'arricurdàrisi quannu finìu la caristìa dû 1646 pi miràculu di Santa Lucia.

Storia di Santa Lucia[cancia | cancia la surgenti]

Lucia nascìu a Sarausa ô sperdiri dû III sèculu doppu di Cristu di na famigghia nòbbili tra li cchiù mpurtanti dâ cità. La matri d'idda si chiamava Eutichia (ca veni a diri furtunata), mentri ca dû patri nun avemu tanti nutizzî, ma si sapi sulu ca chistu murìu quannu Lucia avìa ancora 5-9 anni.
La matri avìa fidi a Cristu e cci la trasmittìu macari a Lucia, ma nta ssu pirìudu ssa riliggiuni era clannistina e matri e figghia prijàvanu ammucciuni.
Appoi Euticchia appi na malatìa ca nuddu mèdicu sapìa curari e, sparti, nudda spiranza di campari tantu assai ci avìanu datu: allura Lucia pigghiau a sò matri e si la purtau 'n pilligrinaggiu a Catania, unn'era la tomba di Sant'Aita p'addumannàrici la grazzia dâ guariggiuni di sò matri; arrivaru a Catania a lu 5 di frivaru, jornu di l'annivirsàriu dû martìriu dâ vèrgini catanisa. Doppu la missa, Lucia s'addummiscìu e ntô sònniru ci accumparìu Sant'Aita ca cci prumittìu di sanari a sò matri e ci dicìu macari ca idda, Lucia, avissi stata fatta santa. Quannu Lucia s'arusbigghiau, vitti ca sò matri nun era cchiù malata.
Turnati â casa, Lucia ci dicìu a sò matri ca non si vulìa maritari cchiui, ma ca si vulìa additicari p'aiutari li puvireddi e spènniri tutti li ricchizzi dâ famigghia p'iddi.