Catridali di Palermu

La Catridali (o la Matrici) è la cresia cchiù mpurtanti di Palermu. Si pò cunzidiràrila na sìntisi dâ storia d'arti e d'architittura di l'ùrtimu millenniu pû fattu ca s'unìscinu tanti stili. Ogni vota ca vinni rinnuvata, si cci vinni agghiunciuta n'àutru stili, unu supra chiddu ùrtimu. Si vìdinu tracci dû gòticu sicilianu, dû gòticu catalanu e ovviamenti dû baroccu sicilianu e puru n'anticchia dû neoclàssicu. Camilleri cci discrivi stu stili quasi caòticu comu nu puema architittònicu.

Custruiuta duranti lu regnu dû re nurmannu, Gugghiermu II di Sicilia (1153-1189), dittu lu bonu, versu la fini dû sèculu XII, vinni accabbata ntô 1185, quattru anni prima dâ sò morti. Nta stu locu d'orìggini cc'era na basìlica cristiana antica funnata di San Grigoriu Magnu e poi adatta a muschea dî saracini. Vinni pruggitata di l'Arcivìscuvu Gaultieru Offamil (o Walter of the Mill, d'orìggini anglu-nurmannu).

Havi na furma rittàngulu e è sustinuta di quattru turri di l'èbbica nurmanna, suprastata di na cùbbula. Ô sud veni unuta ô palazzu arciviscuvìli cu dui granni arcati acuti supra cui spunta la turri campanaria. Dintra vinni cunzirbatu anticchia dû pirìudu nurmannu. Nutèvuli, ntrâ sagratu, li quattru stàtui dî Santi, lu pòrticu miridiunali dû sèculu XV e lu purtali di Antoniu Gambara.

Ntâ navata dritta si ponnu assirvari li balati magnìfichi dî suvrani nurmanni e svevi, di Ruggeru II di Sicilia, sò figghia Custanza di Sicilia, sò maritu Arricu VI e lu figghiu di Custanza e Arricu, Fidiricu II, mpiraturi e stupor mundi.

Di facci â Catidrali dû latu miridiunali, s'allàrica na bedda chiazza câ stàtua di Santa Rusalìa, Patruna di Palermu.

Rifirimenti

Sarvaturi Camilleri (1998) Vocabolario Italiano Siciliano, Edizioni Greco, Catania.

Mmàggini

Facciata
Facciata miridiunali
Turri
Cùbbuli nichi
Àbbissidi
Àbbissidi
Àbbissidi
Àbbissidi
Navata
Sepulcru di Fidiricu II ntrâ Catidrali