Custanza d'Aragona

Particulari di na miniatura unni cumpari Custanza di Araguna.

Custanza d'Aragona, Custanza II di Sicilia o Custanza di Hohenstaufen, Gonstanza 'n araunisi, Constança, 'n catalanu e 'n portughisi, Constanza 'n spagnolu, 'n asturianu e 'n galizzianu, Konstantza 'n basco, Custanza 'n sicilianu, Costanza nô talianu, Kostanze 'n tedescu e Constance 'n francisi, 'n fiammingu e 'ngrisi (Catania, 1249 – Barcillona, 1302), fu na suvrana siciliana; principessa sveva fu riggina d'Aragona (1262-1285) e doppu lu ntirventu aragunisi duranti li Vespri siciliani (1282) riggina di Sicilia nzinu ô 1285.

Urìggini

Fu figghia dû re di Sicilia Manfredi (dunca niputi dû mpiraturi Fidiricu II di Hohenstaufen) e di Biatrici di Savoia (?-1258).

Biografìa

Custanza si spusau a Montpellier (Francia) lu 15 di giugnettu 1262 Petru III d'Aragona, figghiu dû re d'Aragona Giàcumu I lu Cunquistaturi e dâ pricipessa ungarisa Viulanti, figghia dû re d'Ungarìa, Andrea II.

Ntô 1266, lu patri, Manfredi di Sicilia, ô cummattimentu di Beniventu, contra Carlu I d'Angiò, pi di cchiù dû regnu si pirdìu la vita, mentri li cchiù nfruenti famigghi siciliani comu li Lauria, li Lanza (la famigghia dâ nanna di Custanza) e li Procida s'arrifugiaru n Aragona.

Doppu la morti dû cucinu Curradinu di Hohenstaufen, ntô 1268, Custanza comu ùnica e liggìttima discinnenti dâ casata sveva, circau di ripigghiari pussessu dû Regnu di Sicilia ammuttannu lu maritu Petru ad ntromittìrisi ntê vicenni dû regnu di Sicilia.

Ntô 1276 Custanza fu ncurunata riggina d'Aragona.

Petru III, c'addisiava a ricunquistari pâ muggheri lu regnu di Sicilia e avìa cuntatti cu la nubbiltà chi era scuntenta dâ duminazzioni angioina, ntô 1281, nizziau na cruciata contra lu Nordafrica.

A sècutu dâ guerra dî Vespri siciliani, dû 1282, Custanza ammuttau lu maritu Petru a ntromittìrisi ô ciancu dî siciliani. Petru accittau e n austu sbarcau a Tràpani, cu 600 surdati e 8000 almugaveri. Custanza fu ncurunata riggina di Sicilia a Palermu lu 30 di austu dû 1282, cu Petru.

Doppu la morti dû maritu (1285) Custanza cuntinuau a accupàrisi dâ Sicilia, pi cuntu dû figghiu Giàcumu.

Custanza murìu a Barcillona ntô 1302, unni fu sippilluta nnâ cresia di San Francescu.

Discinnenza

Di l'unioni cu Petru appi sei figghi:

• Alfonzu (1265-1291), dittu "lu Libbirali", fu re di Aragona;
• Giàcumu (1267-1327), dittu "lu Giustu", fu re di Sicilia e re di Aragona;
• Isabella, ditta "la Santa", fu riggina di Portugallu (1271- 1336);
• Fidiricu (1272-1337), fu re di Sicilia e re di Trinacria;
• Viulanti (1273-1302), spusata ntô 1297 cu Rubbertu d'Angiò;
• Petru, fu prìncipi d'Aragona e di Sicilia (1275-1291).

Vuci currilati

• Munarchi di Sicilia
• Vespri Siciliani