Carmen Consoli

Carmen Carla Consoli (4 di sittèmmiru 1974) è na cantanti o, comu ama difinìrisi, cantantissa. Cèlibbri doppu la sò prima participazzioni ô festival di Sanremu, sta catanisa è oi arricanusciuta comu una dî cantanti taliani cchiù rapprisintativi.

Biografia

Lu nomu estisu è Carmen Carla, di li nòmura dî sò dù nanni. Lis ò primi ricordi appartèninu â villetta rùstica di S.Giovanni La punta, paiseddu a picca chilòmitri di Catania. Crisci circunnata di l’armali e dâ mùsica ca curtiva Lu patri: mannulini, chianuforti, tammureddi, banjo e na chitarra appartinuta a Modugno. Lu patri, Giuseppi Consoli, ci trasmetti l'amuri pi la mùsica blues e la mùsica nìura grazzi a li disca di B.B King o di Creedence Clearwater Revival. La sò carrera di musicista parti dâ citati etnea unni l'artista s’esibbisci nta vari pub cu la cover-band Moon Dogs's Party unni esèquinu brani di Otis Redding, Aretha Franklin e Janis Joplin (granni amuri di Carmen). Doppu brevi apparizzioni televisivi pressu emittenti lucali e nazziunali (participau â trasmissioni tribbutu pi Mia Martini, cunnutta di Michele Santoro), lu ncontru filici cu lu prudutturi Franciscu Virlinzi e lu cuntirràniu Mariu Venuti la fannu sbarcari supra lu palcu di lu Festival di Sanremu 1996 cu la canzuna Amore di plastica cuntinuta nta l'album d'esordiu Due parole.

Òttimu successu pi la crìtica, la grinta di sta picciuttedda ca mbrazza la chitarra e sussurra urli a mitati tra Dolores O'Riordan (vuci di li Cranberries) e Janis Joplin la pòrtanu direttamenti ‘n finali, cunfirènnucci lu tìtulu di Big nta l'edizzioni di lu 1997 â quali s’apprisenta cu lu sìngulu Confusa e felice nclusa nta l'omònimu album. Accumenza un novu tour ‘n giru pi l'Italia, doppu la spirienza ‘n vesti di supporter a li cuncerti di Raf duranti lu mmernu.

Ntô 1998 canta ‘n duettu cu l'amicu Mariu Venuti ntô branu "Mai come ieri", c’utteni n’òttimu successu di vìnniti, pirmittènnucci d‘accrìsciri la sò frama.Lu novu rock talianu fa prusilitismu. È l'autunnu di lu 1998 quannu nesci n’album travurgenti e di li toni stridenti: Mediamente isterica.

Lu successu a lu granni pùbbricu junci ntô 2000 quannu torna a Sanremu cu un look tuttu novu, tagghiu curtu e culuratu, prisintannu la canzuna "In bianco e nero" (ispirata â matri d’una sò fan ca scappa di casa e si reca di Carmen p’un certu pirìudu) c’antìcipa la nisciuta nta li stissi jorna di lu quartu album: Stato di necessità cuntinenti l’accussidditta "triluggìa di l'erotismu" ("Bambina impertinente", "Stato di necessità" e "Il sultano"). È cu canzuni comu "Parole di burro" e "L'ultimo bacio" (già culunna sunora di l'omònimu film di Gabriele Muccino) ca cattura l'attinzioni di lu pùbbricu talianu.

Hà scrivutu pi Paola Turci lu testu di "Saluto l'inverno", prisintatu a lu Festival di Sanremu dû 2001. Nta l’astati dû stissu annu è siquitu un tour cu Max Gazzè e cu la stissa Turci.

Ntô 2002 pùbbrica na raccolta live, fruttu d’un tour acùsticu pi li triatri taliani, L'anfiteatro e la bambina impertinente riggistratu ‘n CD e DVD pressu lu Triatru Grecu di Taurmina.

Sound soft e milòdicu puru pi lu quintu discu di nèditi L'eccezione, succisivamenti pubbricatu cu lu nomu "Carmen Consoli" pi lu mircatu straneru, cu arcuni brani tradutti ‘n ngrisi e cu l'agghiunta dâ cover ‘n chiavi rock di "Can't get you out of my head" di Kylie Minogue. Lu 2003 arriggistra lu primu showcase talianu di MTV, ca nesci appoi cu lu tìtulu Un sorso in più.

Lu 12 di maiu di 2006 pùbbrica "Eva contro Eva" anticipatu di lu sìngulu Signor tentenna. A l'album partècipanu noma ccillenti tra cui la cantanti africana Angelique Kidjo ca duetta ntô branu Madre terra. Ntô sittèmmiru di lu 2006 nesci lu secunnu sìngulu Tutto su Eva.

N cuncumitanza cu la nisciuta di Eva contro Eva Carmen parti n tour, Dal Simeto al Tamigi è lu tìtulu. Un viaggiu, ‘n autobus, ca parti dâ sò Sicilia (lu Simetu è un ciumi sicilianu c’attraversa Catania), acchiana tutta la pinìsula pi appoi passari la fruntera e fàciri tappa macari nta arcuni capitali europei. Li dati sunnu aperti di lu gruppu di li Lautari, gruppu folk sicilianu pruduttu dâ stissa cantantissa e cu cui Carmen s’esibbisci puru nta lu cursu di li cuncerti, nzèmmula càntanu la canzuna Ciuri di campo, na puisìa di Pippinu Mpastatu musicata di li Lautari stissi. Lu tour veni nterruttu a lu nizziu di lu sittèmmiru di 2006 pi la primatura, quantu tràggica, scumparsa d’unu dî musicisti di Carmen, Liandru Misuriellu, bassista ca di tanti anni sunava câ cantantissa.

Nta l'austu di 2006 havi statu òspiti dû Festival Notte della Taranta, duranti lu quali cantau canzuni pupulari salentini ‘n griko e ‘n dialettu salentinu.

Lu18 sittèmmiru di 2006, ci veni assignatu lu "Premio Carosone alla Carriera", lu ricanuscimentu voli primiari la svota miditirrània di l'artista catanisa la quali, si leggi nta li mutivazzioni, nta l'album "Eva contro Eva", havi rializzatu cu grazzia, irunìia e passioni un pircursu `n eculibbriu pirfettu tra tradizzioni e mudirnitati, evitannu accuratamenti qualisiasi ncirenza, d'oltralpi e d'oltreocèanu, pi sèquiri na ricerca musicali e puètica urigginali ca la cunferma quali artista di rifirimentu di lupop d'auturi talianu.

Lu 21 di sittèmmiru di 2006 ntraprenni un mini tour d’ottu dati tra Stati Uniti e Canada ca s’havi cunchiudutu lu 2 d’ottùviru.

Ntô jinnaru di 2007 parti cu un novu tour triatrali ‘n giru pi l'Italia ca vidi la participazzioni dâ riggista siciliana Emma Dante, la quale scrivi di li testi supra arcuni di li pirsunaggi tratti dî canzuni di Carmen (nterpritati supra lu palcu di l'attrici Simona Malato).
Ntô frivaru dû stissu annu nesci lu film Saturno Contro di Ferzan Ozpetek, la cui colonna sonora cunteni la cover di Je suis venue te dire que je m'en vais di Serge Gainsbourg nterpritata di Carmen, già nziruta nta l'album État de necessité.

Canzuni n sicilianu

Havi scrivutu na pocu di canzuni n sicilianu: Masinu, 'A Finestra, Focu di Raggia (nzèmmula a Goran Bregovich). Havi cantatu puru canzuni tradizziunali siciliani comu Malarazza e "Stranizza d'amuri" di Francu Battiatu.

Curiusitati

Ntô 2000 lu riggista Gabriele Muccino ntìtula un sò film, L'ultimo bacio, cu lu tìtulu di na canzuna di Carmen Consoli ca scegghi puru comu culunna sunora di lu film. La cantanti partècipa midemma a li riprisi di lu film cu un camèu nicu e na batuta ùnica: Minchia l'Africa, mi ci porti? (ricitata cu nflissioni sìcula). L'ex muggheri di lu stissu riggista era nortri una dî viulinisti ca sunau pi la cantanti nta lu cuncertu a lu triatru grecu di Taurmina ntô 2001
È notu l'eculibbriu pricariu dâ cantanti durante li cuncerti. Nta numurusi accasioni s’havi arritruvatu n terra doppu aviri truppicatu supra quarchi cavu, e ci havi oramai l'abbitùtini d’irunizzari supra la cosa accinnannu lu cantu d’una sò canzuna, Confusa e felice, parudiata ‘n Contusa e felice.
Â trasmissioni di Santoro, Carmen vinni apprisintata a Loredana Berté, la quali, rifirènnusi a la diffìcili carrera ca s’appristava a ntraprènniri la jòvini artista, ci dissi "cunnugghianzi", lassannu tutti di stuccu. Appoi parò si cumprimintau cu la Consoli pi la sò abbilitati comu cantautrici e musicista e li dù addivintaru amichi.
Lu 3 di sittèmmiru di 2006 travotu di n'autumòbbili davanti a na discuteca di Santa Margherita di Pula a Cagliari, mori lu bassista dâ band di Carmen Consoli, Leandro Misuriello picca uri doppu lu concertu dâ cantanti a l'Anfitriatru Rumanu di Cagliari. Scummurciuta pi la pèrdita di l'amicu e cullega, Carmen dicidi d’annullari lu sò tour estivu e li mpegni prufissiunali ca prividìanu la sò participazzioni a lu Festivalbar, a lu Premio Carosone, a l'Mtv Day e a lu cuncertu di Via Asiago di Radio1.

Discugrafìa

Album

1996 - Due parole (10.000 copi vinnuti)
1997 - Confusa e felice (130.000 copi vinnuti, #6)
1998 - Mediamente isterica (80.000 copi vinnuti, #4)
2000 - Stato di necessità (300.000 copi vinnuti, #4)
2001 - État de necessité (pubbricatu ntâ Francia)
2001 - L'anfiteatro e la bambina impertinente (dû vivu cu orchestra) (200.000 copi vinnuti, #7)
2002 - L'eccezione (#1)
2002 - Carmen Consoli (virsioni ngrisa di L'eccezione)
2003 - Un sorso in più (dû vivu a MTV Supersonic) (#20)
2006 - Eva contro Eva (#1)
2009 - Elettra

Sìnguli

1995 - Quello che sento
1996 - Questa notte una lucciola illumina la mia finestra
1996 - Amore di plastica
1996 - Lingua a sonagli
1996 - Quello che sento - The Remixes
1997 - Confusa e felice (#3)
1997 - Venere
1997 - Uguale a ieri
1998 - Besame Giuda
1998 - Besame Giuda II
1998 - Puramente casuale
1998 - Eco di sirene
1998 - Autunno dolciastro
2000 - In bianco e nero (#10)
2000 - Parole di burro
2000 - Orfeo
2000 - Parole di burro (remix) (#4)
2000 - L'ultimo bacio
2000 - Gamine impertinente (pubbricatu ‘n Francia)
2002 - L'eccezione (#4)
2003 - Pioggia d'Aprile
2003 - April Showers (pubbricatu ‘n Spagna e Girmania)
2003 - Fiori d'arancio
2006 - Signor Tentenna
2006 - Tutto su Eva

Dvd

2001 - L'anfiteatro e la bambina impertinente (virsioni firmata ntigrali dû cuncertu dû vivu cu orchestra)

Cullabburazzioni

1991 - Caftua - vuci nta lu branu One day
1995 - Lula - vuci agghiuntiva ntô branu Nihil laudamus
1995 - Lula - cori ntô branu Non capisci, è distante
1996 - Nuovi Briganti - vuci ntô branu Lascia che sia così
1997 - Marco Di Mauro - duettu ntô branu Cantico all'amore
1997 - Francesca Lago - autrici di lu branu Sognatrice
1997 - Marco Parente - duettu ntô branu Oio
1998 - Nathalie Merchant - parratu nta lu branu Ophelia
1998 - Mario Venuti - duettu ntô branu Mai come ieri
1999 - Irene Lamedica - chitarra ntô branu 7 giorni su 7
1999 - La Crus - vuci ntô branu Anche tu come me
2000 - Paola Turci - autrici dû branu Sabbia bagnata
2001 - Paola Turci - autrici dû branu Saluto d'inverno
2001 - Ron - autrici dû branu Cambio stagione
2001 - Lucio Dalla - parratu ntô branu Siciliano
2001 - Max Gazzè - duettu ntô branu Il motore degli eventi
2002 - Luca Madonia - duettu ntô branu Meravigliandomi del mondo
2004 - Gianni Maroccolo - autrici e ntèrpriti di lu branu Carezza d'autunno
2007 - Goran Bregovic – ntèrpriti di lu branu Focu di Raggia

Band

Massimo Roccaforte - chitarrista ca di sempri accumpagna a la cantanti
Santi Pulvirenti - chitarrista
Puccio Panettieri - battarista dûl 1999
Enzo Ruggiero - bassista nzinu a lu 1998
Leandro Misuriello - bassista di lu 1999 scumparsu lu 3 di sittèmmiru di 2006
Leif Searcy - battarista dâ band nzinu al 1999

Liami nterni

Cantanti e gruppi musicali siciliani

Culligamenti sterni