Bannera purtughisa

Dâ Wikipedia, la nciclupidìa lìbbira.
La bannera purtughisa

La bannera purtughisa è nu rittangulu di prupurzioni 2:3 culuratu di verdi e di russu. La banna verdi, a manca, pigghia 2/5 dâ bannera, mentri chidda russa pigghia li arristanti 3/5. A lu centru di ssa partizzioni s'attrova lu clàssicu scutu purtughisi (scutu russu cu setti casteddi giarni ca sècunu, firriannu ô sò centru, n'àutru scutu jancu cu àutri cincu scuti blè cu àutri cincu punti janchi nterni) e nn'arreri na sfira armiddari d'àuru. È la bannera ufficiali dû Portugallu di lu 30 di giugnu 1911.

Urìggini e significati[cancia | cancia la surgenti]

Puru siddu lu scutu purtughisi nascìu n tempi antichi (sèculu XII), la bannera nta sta mpustazzioni è d'urìggini praticamenti ricenti. Nfatti già cu la rivoluzzioni ripubbricana dû 1910 la si putìa vìriri, accussì comu è òi, purtata pi li strati di li Lisbona. La quistiuni cchiù ntirissanti pirò è sicuramenti chidda dû significatu e di li culuri e di lu stemma purtughisi. Supra a l'utilizzu di sti culuri cci sunnu assai ntirpritazzioni: verdi di li boschi di sùaru (principali fonti d'aspurtazzioni pû Portugallu) e russu di lu sangu virsatu pi la patria, o macari verdi pi lu culuri d'ucèanu prufunnu e russu di la ntrabbuliata e di l'àrba ncapu a li navi purtighisi. Si la prima ntirpritazzioni, chiddda cchiù accittata a liveddu populari, nascìu nti li anni di lu riggimi di Salazar (piriudu d'isartazzioni di la patria e di li valura purtughisi), la secunna, sturicamenti assai cchiù prubbàbbili, nascìu nti li anni di attrivuri nazziunalista n cui si buscavanu, sutta l'ammuttata rumantica, li fasti di li granni asplurazzioni quannu li purtughisi avìanu fama di granni aspluratura (vidi Vasco da Gama e Magillanu), cunquistatura e duminavanu li mari di lu munnu anticu; dunca chissu mutivu d'urgugghiu avissi avutu a carattirizzari particularmenti e majurmenti tutta la sucitati purtughisa n tutti li sò aspitti. N'àutra ntirpritazzioni voli ca li culuri sunnu chiddi pan-ibberichi di lu piriudu antura la rivoluzzioni ripubbricana ma, puru siddu st'idiuluggìa era assai n auge tannu, pari assai mprubbàbbili n'"arricampata" pi menzu dâ bannera a lu vecchiu fidiralismu panibbericu assai ustiggiatu a li tempi di l'unioni cu la Spagna ntô sèculu XVII.

Pi zoccu sparti la sfira armiddari, ca sustituivi a nu certu puntu la vecchia curuna riali, chissa è nu chiaru arrifirimentu a lu mperu culuniali a li tempi d'aduzzioni dâ bannera, quannu li purtughisi rapprisintavanu ancora li cchiù granni scupritura dû munnu.

Supra lu scutu, li setti casteddi rapprisentanu li regni mureschi cunquistati di reghi Alfonzu III (puru siddu li sò conquisti eranu nuvi, nun si sapi picchi doppu reghi Giuvanni II arriducìu lu nùmmaru a setti) ntô 1249; mentri li cincu scuti blè cu li cincu punti janchi dintra s'arrifiriscunu a la liggenna secunnu cui, doppu la battagghia di Ourique (26 di giugnettu 1139) unni Alfonzu Henriques scunfiggìu li cincu reghi mureschi (li cincu scuti blè), ddu primu reghi purtughisi addicidìu d'arringrazziari Gesù pi èssirici cumparutu n sognu avanti di cummattiri ddu jornu pittannu li sò cincu feriti dâ cruci nti lu sò scutu. Lu scutu purtughisi si virìu sempri nti li stemmi riali o nti li simmuli purtughisi, puru siddu lu drappu o la bannera canciavanu spissu (s'arricorda nfatti ca la bannera purtughisa prima di chidda d'òi era, p'asempiu, o tutalmenti janca o videmma janca e cilesti unni lu cilesti addinutava lu caratteri marinaru dû Portugallu).

Vecchi banneri[cancia | cancia la surgenti]

Lijami nterni[cancia | cancia la surgenti]

Lijami di fora[cancia | cancia la surgenti]