Votu di scànciu

Dâ Wikipedia, la nciclupidìa lìbbira.

Lu votu di scànciu eni lu votu ca duna cu rigularità nu cittadinu elitturi, ca nun eni mutivatu di scigghiuti pulitichi, ca sunnu lu risurtatu di arriflissioni sinceri e disintirissati, ma ammeci sunnu currumputi di quarchi favuri o turnacuntu arricevutu di cui si candita nta n'elizzioni.

Nta l'Italia lu votu di scànciu pulìticu-mafiusu eni nu riatu e eni punìbbili a li senzi di l'artìculu 416-ter di lu còdici pinali talianu.

Lu votu di scànciu pò manifistàrisi nta nu rapportu direttu ntra lu pulìticu e l'elitturi a scànciu di sordi o di na raccumannazzioni pi nu postu di travagghiu, senza èssiri prisenti nuddu ntiressi di urganizzazioni mafiusi. .
Ntô casu di na furma d'assuciazzioni, lu votu di scànciu pò ntô stissu modu aviri locu pi pigghiari finanziamenti o appalti pùbbrichi, siddu chisti favurìsciunu na cunvirgenza di "massa" pi li voti di li sò iscritti.

Votu di scànciu e ricattu pô travagghiu[cancia | cancia la surgenti]

A li voti si tratta di veri e propri sanareddi, pajamenti di picca sordi spiciarmenti ntê quarteri cchiù pupulari, fatti chiossai nta l'elizzioni cchiù nichi, comu putìssiru èssiri chiddi cumunali o pruvinciali. Cchiù ô spissu si tratta di favuri menu fàcili d'arricanùsciri. Di quannu, p'asèmpiu, foru fatti liggi ca pirmèttunu cuntratti di travagghiu di tipu flissìbbili (a tempu, a cullabburazzioni o a pruggettu), cù havi lu putiri di dari lu travagghiu, ca putìssiru èssiri mprindituri o macari amministratura ô puteri ca hannu disidèriu d'arricèviri cunferma pi lu sò mannatu, pigghiaru l'abbitùtini, macari picca tempu apprima di li ilizziona, di pigghiari a travagghiari assai picciotti disuccupati cu cuntratti di pricariatu, accussini di putiri furzàrili a lu vutu, a scànciu dâ cunferma dû travagghiu. Chistu accapitava macari ntô passatu e stu tipu di ricattu pô travagghiu, fattu supra la peddi di cui havi abbisognu, è cchiù fàcili fàrilu ntê rialità unni c'è na forti disoccupazzioni, comu ntô sud dâ nazziuni taliana.

Votu di scànciu e urganizzazzioni criminali[cancia | cancia la surgenti]

Àutri furmi cchiù gravi, quantu assai capaci, di "votu di scànciu" sunnu chiddi pi cui veni sfruttata, nta lu corsu di li cunzultazzioni elitturali, la nfruenza ca gruppi mafiusi fannu supra na granni parti di la pupulazzioni pi fari jiri li voti agghiri a nu ditirminatu partitu, ca favurìu, cu leggi o cu la cuncissioni di appalti pâ custruzzioni di òpiri pùbbrichi, lu sviluppu di l'attivitati mprindituriali dâ mafia.
Stu finominu appi a accuminciari â fini di l'anni cinquanta, quannu la mafia si traspurmau nta na grossa azzienna multinazziunali e misi li ràdichi nta lu sitturi di li custruzzioni e di la finanza ntirnazziunali. Lu votu di scànciu si pò fari macari nta na manera menu gravi, attraversu gruppi ca hannu na qualsiasi nfruenza, comu p'asèmpiu cìrculi pô jocu, e culturali, mpriditura, assuciazziuni, enti riliggiusi. sinnacati, ecc.
Chiddu ca pirò fà addvintari l'attu non ligali e spriggèvuli eni l'abbusu di putiri nnirizzatu a fari favuri a destra e a manca, a scànciu dû votu o macari cu l'òbbricu ô votu di cui havi, nun no na sèmprici nfruenza, ma nu putiri suciali ca cci pirmetti di faciri lu ricattu.

Accirtamentu dû votu non-lècitu[cancia | cancia la surgenti]

Ntâ tiorìa fussi mpussìbbili sapiri si lu cristianu elitturi vutau pô pulìticu o pô partitu pulìticu pri cui avìa a vutari, grazzi a lu votu sicretu, ma ntâ rialitati di mètuti ci nni sù tanti, spiciarmenti grazzi a la prifirenza, unni si scrivi lu nomu dû canditatu o la cruci ca si menti supra lu sìmmulu nta na manera ca fussi ricanuscìbbili a lu scrutaturi.
Di quannu pirò ci sunnu, e sù accuddì diffunnuti, màchini futucràfichi di nichi diminzioni e diggitali, ca ponnu scattari futucrafìi senza fari nuddu sgrùsciu, lu "votu di scànciu" addivintau ancora cchiù sèmprici di fari: lu citatinu currottu ntra lu seggiu elitturali, signa la scheda e ci faci na fotucrafìa cu lu cillulari, la fotucàmmira o lu vidiucillulari, e appoi ammustra la mmàgini ô pulìticu o a li sò e arricivi accussì lu favuri addummannatu.
Pi stu mutivu, lu Cuvernu talianu, prisidutu di lu premier Rumanu Prodi, stabbilìu pi dicretu liggi di lu 1º aprili 2008 rèuli siveri e peni asimplari nzinu a l'arrestu pi cui và a vutari purtànnusi na fotucàmmira o cillulari ca ponnu fari fotucrafìi .[1]

Nota[cancia | cancia la surgenti]

  1. ^ Contr'a lu votu di scànciu nenti fotu ntê seggi. Il Sole 24 Ore. Retrieved on 02-04-2008.

Lijami d'intra[cancia | cancia la surgenti]

Elizzioni