Silviu Berlusconi

Silviu Berlusconi

Silviu Berlusconi (Milanu, 29 di sittèmmiru 1936) è l'attuali primu ministru talianu. Doppu aviri fattu furtuna comu mprinnituri di l'editurìa, di la custruzzioni e di la telecumunicazzioni, ntô 1994 funnau lu partitu Forza Italia chi ntô 2008 cunfluìu ntâ nova formazzioni chiamata Pòpulu dî Libbirtà puru idda ispirata di Berlusconi e chi nglobbau puru l'autra principali forza dû centru destra italianu, Allianza nazziunali.

Ntô 1994 vincìu l'elizzioni pulìtichi e addivintau primu ministru pi la prima vota. Lu primu cuvernu jìu 'n crisi lesta lesta, pirchì cci foru sciarri cu la Lega Nord di Ummertu Bossi.

Doppu quarchi annu passatu a l'upposizzioni, ntô 2001 vincìu n'àutra vota l'elizzioni pulìtichi, e a capu di la coalizzioni di centru dritta furmau lu secunnu cuvernu Berlusconi. Lu 24 di aprili dû 2005, doppu na crisi pulìtica duvuta â scunfitta elitturali dî riggiunali, furmau lu terzu cuvernu Berlusconi, secunnu cuvernu dâ liggislatura, chi durau nzinu ô misi d'aprili dû 2006. L'attuali cuvèrnu Berlusconi, lu quartu, nasciu dâ vittoria all'elizzioni ligislativi dû 2008.