San Bartulumeu di Simeri

Bartulumeu di Simeri (Simeri, 1050 - Rossano 19 di austu 1130) è un Santu viniratu da Cresia Cattolica e Ortudossa.

Agghiugrafìa

Lu patri si chiamava Giorgiu e la Matri Elena e dettiru o picciriddu lu nomi di Basiliu. Lu monacu Cirillu, ca stava vicinu ô turrenti Melitellu, ci detti l’abitu di monacu e lu chiamò Bartulumeu.
Stetti na para d’anni supra lu Munti Trigonu, vicinu lu lacu ‘Mpullinu. Ebbi na visioni dâ Madonna ca ci dicìa di arriciviri tutti chiddi ca vulianu fari la vita di monaci. Tra Russanu e Curigghianu ‘ncuntrò lu monacu Nifuni. A Russanu, pi ordini dû Cunti Ruggeru e da muggheri Adilasia fici na Cresia ‘ntitulata a Madonna Odigitria (di l’Itria, vali a diri chidda ca indica a strata). Era circa lu 1100 e poi fu ditta dû Patiriu, vali a diri du Patri Bartulumeu.
Lu viscuvu di Russanu, Nicola Maleinu, vulia li monaci sutta la sò giurisdizioni, ma lu Papa Pasquali II no 1105 dissi ca lu Munasteriu era assuggittatu a Sedi Apustolica. Lu viscuvu Pulifroniu di Bedducastru lu fici parrinu. Iu a Custantinopuli no ‘Mpiraturi Alessiu Comnenu e na ‘Mpiratrici Ireni, ca ci dettiru libbra, vasi sacra, ‘mmaggini di Santi, dinaru e na Tavula di l’Odigitria. Fu mannatu o Munti Athos pi eliminari abbusi no Munasteriu di San Basiliu lu Granni, dittu oj dû calabbrisi. Truvò ustaculu na so missioni né monaci latini. Du monaci da Batia di san micheli di Miletu dissiru o Re Ruggeru II ca Bartulumeu era reticu, avìa spartutu e parenti li picciuli avuti du ‘Mpiraturi e ca facia na vita scustumata. Fu chiamatu a Palermu pi essiri prucissatu. Lu santu monacu nun dissi nenti, ma addumannò di putiri cilibrari la Missa di San Nicola. O momentu dâ Cunsacrazioni si vidi na gran culonna di focu ca acchianava sinu ‘ncelu di sipra l’artari e accussì fu ricanusciutu ‘nnuccenti.
Lu Re Ruggeru vulia riorganizzari li Batii Greci supra lu mudellu di chiddi latini, addumannò a Bartulumeu di funnari un Munasteriu na lingua dû Faru di Missina, didicatu o Santissimu Sarvaturi. Fu cominciata la costruzioni ntô 1122 ma ntô 1128 riturnò o Patiriu, unni numinò lu monacu Luca abbati e muriu ddocu lu 18 Austu du 1130. Lu Munasteriu di Misssina fu finutu dui anni doppu.
Fu sippillutu ntô Munasteriu du Patiriu e la so morti fu ricurdata ‘n Calabria e ‘n Sicilia. U Papa Binidittu XIV (1740-1758) detti l’Ufficiatura e la Missa du Santu e Diocesi di Catania, Missina e Saraùsa. A Gruttafirrata (RM) è ricurdatu lu 19 Austu.

Riliquii

Un brazzu du santu era sarvatu nò Munasteriu di San Bartulumeu di Trigona (Sinopuli) e nall’artaru maggiuri da Cresia da Madonna di Grazii era un quatru du Santu. Autri Riliquii eranu a Piazza Armirina e no monasteriu du SS. Sarvaturi di Missina, cu un vrazzu du Santu dintra un Riliquiariu di rami ca testa d’argentu (oj o Museu Diucisanu).

Bibbriugrafìa

G. Musulinu, Santi rimiti Italu-Greci, Rubbettinu Edituri Suveria Mannelli (CZ), 2002
U Bios di San Bartulumeu da Simeri a cura di Gaia Zaccagni (BHG 235) in
Tradizione Cristiana
Associazione Culturale Simeri
Santi e Beati