Polifemu

Dâ Wikipedia, la nciclupidìa lìbbira.
MITULUGGÌA GRECA
DEI
EROI
CRIATURI FANTÀSTICHI

Polifemu era nu Ciclopi cu n’occhiu sulu ammenzu a la frunti; figghiu di la ninfa Toosa e di Puseidoni (chiamatu Nittunu dê latini) e frati di Zeus (Giovi) re di l’Olimpu.

Nu Ciclopi

Li Ciclopi sunnu figuri favulusi di la mituluggia greca, àuti gigantiscamenti e cu n’occhiu sulu ammenza a la frunti (dô grecu kuklops = di l'occhiu tunnu).

Nta èbbica antica li mitùgrafi cuntàvunu tri stirpi di ciclopi: li figghi di Uranu e Gaia (lu Celu e la Terra), ca appartinèvunu a la prima ginirazzioni divina di Giganti; li Ciclopi "custruttori", ca custrueru tutti li munumenta pristòrichi ca si vidèvanu ‘n Grecia, ‘n Sicilia e artrovi, costruiti cu grannìssimi blocchi (li "mura ciclòpichi") e li Ciclopi "siciliani", cumpagni di Polifemo, cuntatu di Omeru

Li Ciclopi siciliani sunnu macari li firrari di li dei, sutta lu cumannu di Efestu diu dô focu, àbbitanu la Sicilia e li Eolî, nta caverni suttirranî unni li corpi di la ncùdini e lu ansimari fa bruntulari î vurcani di la zona, mentri ca lu focu di la fucina arrussa la cima di l'Etna


Polifemu taliatu di Omeru[cancia | cancia la surgenti]


«  … era nu mostru gicantescu, nun assumigghiava a nudda stirpi d’omu ca di pani si nutri, ma a la cima silvusa di na muntagna smisurata ca appari isulata di l’àutri. »
(Omeru - Udissea, Canto IX)

Accussì Omeru cunta di Polifemu ntô IX libbru di l’Udissea.

”Vestibbulu do Polifemu" (nta la "Villa Rumana di lu Casali", 'n Sicilia)

La liggenna di l'incontru tra Ulissi e Polifemu è cuntata nta l’ "Udissea": Ulissi, ntô sò jiri pô Miditirràniu sbarca nta n'ìsula, la "Terra dê Ciclopi", unni addumanna uspitalità a lu gigantescu Polifemu. Lu ciclopi, anveci, ammazza e si mancia arcuni cumpagni di Ulissi; allura, iddu, ci duna a bìviri vinu a Polifemu e, na vota ca chistu è mbriacu, ci annorva cu un palu nfucatu l’ùnicu occhiu c'avìa e accussì Ulissi e li sò cumpagni arrinèsciunu a fujìri ‘n prèscia agghìri la sò navi.
Lu ciclopi orvu e annìricatu di la raggia, pi vinnicàrisi, ci abbìa ‘n coddu a la navi li cima di arcuni munti, ma senza anzittàrila, e, secunnu la liggenna, ssi cima sunnu li faragghiuni di Aci Trizza.
(Dici Omeru ca “la Terra dê ciclopi, era n’isula ntô miditirraniu".)

Polifemu, secunnu Omeru, ortri ca gicantescu, chinu di pila e sirvaggiu, era macari tanticchia stùbbutu e ammuccaloru. Nfatti, Ulissi, ca rapprisenta nta l’Udissea anveci la ntiliggenza e la civirtati (accussì, li grechi, si vidèvunu iddi stissi), ci ncùcchia ca lu sò nomu è "nuddu" (nissunu) e quannu li cumpagni ciclopi ci spìunu a Polifemu “chi fu ? cu fu ?”, ca chistu ittava santijùni doppu ca fu annurvatu, Polifemu, comu nu scimunitu, ci dici ca fu “NUDDU” (nissunu).

Polifemu taliatu di Teocritu[cancia | cancia la surgenti]


Galatea (Gustave Moreau 1880, Ogghiu supra pannellu)
«  “Oh! Lu sacciu, bedda picciotta, pirchì tu mi fuji: pirchì la frunti m’invadi di l’irsutu miu cigghiu pilusu, di n’ aricchia a l’àutra, e n’ occhiu suliddu sutta si schiudi”. »
« "...E comu a nuddu di li Ciclopi sacciu sunari la sampugna,cantannu di tia ...”  »
(Teocritu, Idilli XI, Lu Ciclopi )

Chissu è l’autoritrattu ca Polifemu fa di iddu stissu a l’amata ninfa Galatea, ntô IX Idìlliu di Teocritu.
Nta l'idìlliu, Polifemu veni cuntatu comu unu di li tanti pasturi misu nta la natura arrigugghiusa e sulari, china di culura e di frutti.
Li carattirìstichi di l’ambienti sunnu propiu chiddi dô paisaggiu di l'Etna, riccu di boschi e di acqua.
Nta la parti cintrali di l'idìlliu veni cuntatu dô cantu dô Ciclopi, ca, grazzzi a chissu, arrinesci a rènniri chiù sumpurtàbbili lu prufunnu duluri ca ci duna l’amuri nun currispostu di Galatea.

Ccà attruvamu nu ciclopi ngintilitu, assai diversu di la divinitati dô IX cantu di l’Udissea, mmagginatu comu divuraturi d'òmini; lu gicanti si umanizza nta nu picciottu rozzu, ma sintimintali, nnamuratu di Galatea.

Polifemu taliatu di Ovidiu[cancia | cancia la surgenti]

Polifemu, Aci e Galatea (statua nto Jardinu dû Luxembourg)



Polifemo è macari nu pirsunaggio di la storia di Ovidiu "Acis e Galatea".

« Polifemu fu nu giganti grannissimu, ca era accussì forti ca puteva sustiniri nu macignu. Avìa î pila dâ testa e dê spaddi comu li selvi; purtava ntâ testa n’ùnicu occhiu, ca ci facìa tèniri la parti cintrali di la frunti comu nu granni scudu. Chistu, dunca, amò na ninfa dô mari ca si chiamava Galatea; e, siccomu nun rinisceva a aviri lu supravventu supra d’idda, pô fattu ca sùbbitu chista si mmirgeva nto mari, accuminciò a prijàrila e a facìrici prumissi e canti. Ma, Galatea arrisprizzava tutti sti cosi pirchì era nnamurata di nu beddu picciottu di nomu Aci, ma Polifemu, nìuru di gilusìa, circò comu fari pi vìdiri chisti dui a culloquiu; e nu jornu, truvò lu postu unni vitti Aci e Galatea giàciri nzèmula, e ci jittò ‘n coddu nu mazzacani, e scafazzò Aci ntô mari; ma chistu di la pietà di li dei fu mutatu ‘n funti." »
(Ovidius moralizatus, reductorium morale liber XV, vol. II, p. 170 )


Talìa puru[cancia | cancia la surgenti]