Sicilia (èbbica cuntimpurània)

Ntô 1860 la Sicilia (e lu Regnu dî Dui Sicili) vennu mmàsi sinza dichiarazziuni di guerra sia dî surdati di Garibaldi, prutetti ntô sbarcu dâ marina ngrisi, sia dî 25.000 surdati pimmuntisi (dichiarati disirtura) e aiutati d'autri ufficiali e mercinari di tutti li nazziunalità (ginirali ungarisi, turchi, surdati algerini, indiani, ecc.) a issi s'accucchia quarchi voluntariu sicilianu. La Sicilia, già divastata ecunomicamenti, nun si ripigghia dâ miseria di unni vinìa. Ntû 1866 Palermu ansurgi e dichiara l'innipennenza dâ Sicilia di l'Italia, ma lu ginirali Raffaele Cadorna (patri di Luigi Cadorna) bummarda e ripigghia la cità.

La guerrigghia di risistenza (vidi lu brigantaggiu) ca dura pì decenni, e a riprissiuni pimmuntisi fannu cintinara di migghiara di vittimi (arcuni fonti storichi dicinu circa nu miliuni di morti ntâ tuttu lu sud) e si esaurisci câ migrazziuni di massa ca nta l'anni porta miliuna di siciliani afora ('n particulari nta li Stati Uniti d'America). L'organizzazziuni criminali (mafia) c'accuminzanu a asistiri poi di l'annissiuni a l'Italia (nun s'avinu nutizzi di l'asistenza d'organizzazziuni criminali prima di «l'unità» d'Italia) stinnunu lu loru puteri ntâ tutta l'isula, n'Italia e fora d'Italia.

Ntê stissi anni (1870-1945) ntû munnu mpera lu «razzismu scentificu», e la cchiùparti di l'antrupòlugi e dî criminòlugi taliani (li cchiù famusi sunnu (Cesare Lombroso, Luigi Pigorini, Arcangelo Ghisleri, Guglielmo Ferrero, Enrico Ferri), e puru siciliani comu Giuseppe Sergi e Alfredo Niceforo scrivunu e ripetunu ntê cunvegni taliani e ntirnazziunali ca li siciliani e li miridiunali avinu stati parzialmenti «cuntaminati» di geni d'origgini africana e câ cultura meridiunali evi primitiva e inferiuri. Sta conclusioni ha statu puru accittata dû cuvernu e dî politici taliani (atti dâ cummissiuni d'indaggini ntâ Sicilia dû 1876).

Li criminologgi cunchiusuru ca cù stu «fattu» s'avissi a spiegari la «natura viulenta» e la cultura «criminali» dî meridiunali. Stati miricani comu l'Alabama cunzideranu li siciliani «non-whites» e li suttapunnu a l'apartheid. A Ellis Island (New York) l'immigrati taliani venunu spartiti: taliani dû nord (janchi) di na banna, chiddhi dû sud di n'autra. La Dillingham Commision dû senatu dî Stati Uniti (atti dû 1911) stabbilisci ca l'italiani dû sud nun sunnu uguali a chiddhi «janchi» dû nord e ca li siciliani avinu forti nfluenzi «nigroidi». Ntâ sta manera si spiega l'origgini dû preggiudizziu sia talianu ca munniali contru li meridiunali. Sta discriminazziuni ntâ vari modi dura dô 1890 ô 1940.

La secunna guerra munniali e lu dopuguerra

Ntô 1943, duranti la Secunna guerra munniali, la Sicilia, occupata dî forzi tudischi, fu lu tiatru di n'azzioni di libbirazzioni di la parti dî forzi alliati canusciuta comu Opirazzioni Husky. St'opirazzioni sinnau puru l'inizziu di la libbirazzioni italiana dû nazi-fascismu, chi si cunchiudìu lu 25 di aprili dû 1945.

La situazzioni in Sicilia era comunqui assai cunvulsa. Ntra lu 1941 e lu 1943 accuminzanu n'Sicilia l'azziuni di l'EVIS (Esercitu Voluntariu pi l'Indipinnenza Siciliana) guidata di Antonio Canepa, ca veni ammazzatu lu 17 di giugnu dû 1945. Ma nàscinu àutri muvimenti ca custrìncinu lu Rè Umberto I di Savoia a cuncèdiri nu Statutu d'autonomia spiciali (1946). Lu statutu duna â Sicilia assai putiri (magistratura, pulizzia, scoli, università rigiunali, trasporti, e autonomia fiscali), ma stu statutu nun ha datu li risultati spirati, puru pirchì nun ha statu mai applicatu nni la sò ntirizza.

Rifirimenti e pì sapirini cchiùassai

• Alianello, Carlo (1994) La conquista del Sud. Edizioni Rusconi, Milano. ISBN 88-18-70033-2
• Pedio, Tommaso Economia e società meridionale a metà dell'800. Edizioni Capone.
• Vocino, Michele Primati del Regno di Napoli. Edizioni Mele.
• Scarcella, Gaspare Il brigantaggio in Sicilia Edizioni Antares.
• Lupo, Salvatore (2004) Storia della mafia - Dalle origini ai giorni nostri. Edizioni Donzelli.
• Stella, Gian Antonio (2002) L'Orda - Quando gli albanesi eravamo noi. Edizioni Rizzoli, Milano. ISBN 88-17-87097-8
• Teti, Vito (1993) La razza maledetta - Origini del pregiudizio antimeridionale. Edizioni Manifestolibri.
• Guglielmo, Jennifer & Salerno, Salvatore (2001) Are Italians white? - How race is made in America. ISBN 0-415-93451-6
• Prum, Michel (2000) Exclure au nom de la race (capitulu di Bénédicte Deschamps dû titulu le racisme anti-italien aux États Unis) Edictions Syllapse, Paris. ISBN 2-913165-15-X.
• Papa, Michele (1995) Storia dell'EVIS. L'Esercito Volontario per l'Indipendenza della Sicilia che sfidò lo Stato. Edizioni Cliò, S. Giovanni la Punta (CT).
• Testu ufficiali dâ Cummissioni Dillingham du Senatu dî Stati Uniti; 1911 (Vol. 5: Dictionary of races or peoples).