Si maritau Rosa
'Si Maritau Rosa' è na canzuni tradizziunali siciliana, canusciuta ntî tuttu lu tirritoriu. Ricintimenti la canzuni fu ripigghiata di Robertu Alagna pi nu discu di canzuni siciliani ntitulatu "Sicilien". Tra li virsioni chiù canusciuti s'havâ citari pâ so billizza chidda di Carlu Muratori, ntô discu "Sicily".
Lu testu
[cancia | cancia la surgenti]Tampasiannu nta Internet si ponnu truvari virsioni assai differenti i sta canzuni. Una è a siquenti:
Quannu a nutturna portunu
'Ntra lu quarteri miu
M'affaccia 'nu disiu
Nun pozzu cchiù durmì.
Alleggiu alleggiu apru2
A porta a vanidduzza
Vidu ca è pp'Annuzza
E tornu a lacrimà!
Si maritau Rosa
Saridda e Pippinedda
e iù, ca sugnu bedda
Mi vogghiù marità.
1Autri virsioni simili hannu "taliata" mmeci di "vardata".
2Autri virsioni simili hannu "grapu" o "apru" mmeci di "rapu".
Vidimu ora li virsioni numinati supra. Cuminzamu câ virsioni di Robertu Alagna, comu si poti ascutari ntô video nta Youtube:
Vinni la primavera
Li mennuli sù 'n ciuri
A mia 'n focu d'amuri
Nô cori m'addumò.
L'aceddi s'assicùtunu
Facennu riscurseddi
Di canti cosi beddi
Ca mi fannu sunnà!
Si maritau Rosa
Saridda e Pippinedda
e tu, ca si a chiù bedda,
Ti vogghiu marità.
Quantu biddizzi giuvani
Ca passunu sta strata,
E tu cu 'na vardata
Abbruci stu cori ccà.
Oh Diu, tra pen'e lacrimi
Si sfascia la mè vita
Ti vogghiu fari zita
Ti vogghiu marità.
Si maritau Rosa
Saridda e Pippinedda
E tu, ca si a chiù bedda,
Ti vogghiu marità.
E tu, ca si a chiù bedda,
Ti vogghiu maritari.
Vidimu poi a virsioni di Carlu Muraturi comu si leggi ntô liami sternu:
Vinni la primavera
Li mennuli su 'n ciuri
A mia 'n focu d'amuri
Lu cori m'addumò.
L'aceddi s'assicutunu
Facennu discurseddi
Ah quantu cosi beddi
Ca mi fannu sunnà!
Si maritau Rosa
Saridda e Pippinedda
e ju ca sugnu bedda
Mi vogghiù marità.
S'iddu notturna portunu
Ntra lu quartieri miu
M'accrisci lu disiu
Nun mi fa chiù durmì.
Alleggiu alleggiu rapu
La porta a vanidduzza
Viru ca su nituzza
E restu a lacrimà!
Si maritau Rosa
Saridda e Pippinedda
e ju ca sugnu bedda
Mi vogghiù marità.
Di quantu beddi giovani
Ca tessunu la strata;
Nuddu di 'na taliata
Digna la casa mia.
E ju fra peni e lacrimi
Distruggiu la me vita
Mi vogghiu fari zita
Mi vogghiu marità.
Si maritau Rosa
Saridda e Pippinedda
e ju ca sugnu bedda
Mi vogghiù marità.
Si trovunu poi virsioni assai chiù diversi, cu strofi agghiunti. Pri sempiu, c'èsti a siquenti, chi è u testu dâ discrizioni dû video dû liami sternu "pinurtima virsioni" cu quarchi canciamentu pi riflettiri chiddu chi sentu ntô video:
Vinni la primavera,
li mennuli su 'nciuri,
lu focu di l'amuri
lu cori m'addumò.
E ammiezz'u suli e ' ciuri
abbòlunu l`aceddi,
tutti 'sti cosi beddi
mi fannu suspirà.
Si maritau Rosa,
Saridda e Pippinedda
e iu ca sugnu bedda
mi vogghiu marità.
Si maritau Rosa,
Saridda e Pippinedda
Pi ttia ca si cchiù bbedda
mariti non ci nnè.
Tanti picciotti beddi
passanu di 'sta strata,
ma nuddu 'na vardata
alla me casa dà.
Certu `stu desideriu
distruggi la mè vita,
mi vogghiu fari zita,
mi vogghiu marità.
Si maritau Rosa,
Saridda e Pippinedda
e iu ca sugnu bedda
mi vogghiu marità.
Si maritau Rosa,
Saridda e Pippinedda
Pi ttia ca si cchiù bbedda
mariti non ci nnè.
La rota l`aiu fatta,
la casa l`aiu magari,
schetta nun vogghiu stari,
rannuzza sugnu già.
La curpa è di mè matri,
mi tini arritirata,
ma ora la jurnata
vaju di ccà e di ddà.
Si maritau Rosa,
Saridda e Pippinedda
e iu ca sugnu bedda
mi vogghiu marità.
Si maritau Rosa,
Saridda e Pippinedda
Pi ttia ca si cchiù bbedda
mariti non ci nnè.
Nfini si trova chist'urtima virsioni, chi pari quasi n'autra canzuni. U testu veni di l'urtimu liami sternu, cu canciamenti nichi ca fici iù.
Vinni la primavera
Li mennuli su 'n ciuri
Ed iu, capu d'amuri,
Lu cori m'avvampò.
L'acciddi s'assicutano,
Facennu discurseddi
Maria chi sunnu beddi,
Si vonnu marità.
Si maritau Rosa,
Saridda e Pippinedda,
Ed iu, ca sugnu bedda,
Mi vogghiu marità.
Tegnu la porta aperta,
La mettu a padiduzza,
Ed iu, ca suu nicuzza,
Mi mettu a lacrimà.
Ormai tra pegni1 e lacrimme
Trascurri la mi vita,
Mi vogghiu fari zita,
Mi vogghiu marità.
Ora chi persi tutti
Tutti quanti li speranzi
Mi chiuu na2 stu cunventu,
E nun ci pensu chiù.
Chista è la storia tristi
Di na bellezza rara
Chi nun truvan3 maritu
Ebbi la vita amara.
1Probabilmenti vulìa scriviri "peni" e si sbagliau.
2Prubabilmenti vulìa scriviri "nta" o "nda" o "nna".
3Prubabilmenti una furma truncata di "truvannu".