Scarparu
Lu scarparu (pl: scarpara) è l'artiggianu ca fàbbrica o ripara li scarpi.
Lu misteri dô "scarparu" ntô catanisi o "solachianeddu" ntô palirmitanu, è un misteri anticu, ca si sta pirdennu: iddu cunzisti ntô custruìri scarpi a musura, ma chiddu ca cchiù assai fà, è lu travagghiu di arriparrari li scarpi, risulari, mèttiri li supratacchi e cùsiri li parti ca cu l’usu si spàrdunu.
Lu matiriali usatu dô scarparu veni scigghiutu ‘n basi a nzoccu hann’a sèrviri li scarpi. Si â scarpa s’hà mèttiri ppi n’uccasiuni (nu matrimoniu, na ricurrenza), la peddi havi èssiri dê cchiù priggiati e li rifinitura hannu èssiri fatti boni; si, nveci, li scarpi s’avìanu usari ppi travagghiu, allura, iddi hannu èssiri rubbusti.
Pâ risulatura, na vota s’usava cuoiu duru, mentri oggi si usa matiriali di gumma.
Li ferri dô mastru
[cancia | cancia la surgenti]Li ferri dô scarparu, arristaru quasi li stissi di chiddi di na vota: furmi di ferru (oggi sunnu macari di pràstica) unni vèninu nfilati li scarpi, lu trincetu (un cuteddu assai tagghenti), lu marteddu dê scarpara (cu na furma carattirìstica), tinagghia, lèsina, spacu, augghia, cira, pici, e chiova di musura e forma diversa (siminzedda, taccia).
Ortri ê ferri lu scarparu havi lu vanchiteddu (o bancareddu), ca è un tàvulu di travagghiu vasciu.
