Purtali dî tradizzioni dâ Sicilia/Nu cuntu di Giufà

Dâ Wikipedia, la nciclupidìa lìbbira.
Jump to navigation Jump to search

Giufà e la cijocca

Si cunta ca 'na vota cc'era Giufà; sò matri si nni ijvu a la Missa e cci dissi: «Giufà, vidi ca staju jennu a la Missa, vidi ca cc'è la cijocca, e hav'a cuvari l'ova, la pighgii, cci duni a manciari la suppa e appoi la minti 'n capu arredi, ca nun bazzi ca s'arrifrìddanu l'ova.»

Giufà pigghia la cijocca, cci fa la suppa cû pani e vinu e la civa, tantu chi la civa ca cci la fudda cu li jita e l'affucca e chista mori; quannu Giufà vidi la cijocca accussì morta, dici: «Ora comu fazzu, ca l'ova s'arrifrìddanu! ora mi cci mentu jù 'n capu a l'ova.»
Si leva li càusi e la cammisa e s'incula 'n capu a l'ova, e si cci assetta.

Veni sò matri e cci grida: «Giufà, Giufà!»

Arrispunni Giufà: «Un cci pozzu viniri, ca sugnu cijocca e sugnu misu 'n capu a l'ova , manzinò s'arrifrìddanu.»

Sò matri si metti a gridari: «Birbanti, birbanti ! ca tutti l'ova scafazzasti!»

Si susi Giufà e l'ova sunni tutti na picata.