Prudotti dirivati dû pitròliu

Na raffinarìa a Grangemouth, Scozzia.

Li prudotti dirivati dû pitròliu vennu ottinuti pi menzu dâ raffinazzioni dû pitròliu crudu.

Addipinnennu la cumpusizzioni dû pitròliu minirali e dâ dumanna, li raffinarìi ponnu prudùciri dirivati dû pitròliu 'n quantitati diffirenti, macari siddu la majur parti dâ raffinazzioni è urientata â pruduzzioni di carburanti: ogghiu cummustìbbili e binzina. Tra li prudotti raffinati nutèvuli, la pruduzzioni di sustanzi chìmichi pâ rializzazzioni di plàstica e àutri matiriali è mpurtanti. Pû fattu ca lu pitròliu cunteni na quantitati variàbbili di sùrfuru, pi menzu dâ raffinazzioni è pussìbbili ricavari macari st'ùrtimu; sparti di chissu è pussibili ricavari idrògginu e carbòniu (sutta forma di coke pitrolìfiru). L'idrògginu pò èssiri macari pruduciutu duranti lu reforming.

Majuri prudotti dâ raffinazzioni

Plàstica Asfaltu Diesel Ogghiu cummustìbbili Binzina

Chiruseni Gas pitroliu liquifattu (GPL) Ogghia lubrificanti Paraffina Catrami

Àutri prudotti

Tra li prudotti dâ raffinazzioni si cùntanu tra l'àutri:

• Carburanti gassusi comu lu propanu, mmagazzinatu e distribuitu pi forma lìquida.
• Carburanti lìquidi misti (comu binzini spiciali).
• Lubbrificanti pi autuvitturi.
• Paraffina usata nnâ cunfizzioni di cibbi surgilati.
• Asfaltu - usatu comu aggriganti nnâ pruduzzioni di cunglumirati bituminusi pi manti stratali.
• Coke di pitròliu utilizzatu comu cummustìbbili sòlidu e pi la priparazzioni di alittrodi.
• Prudotti di basa pâ nnustria pitrolchìmica.