Portu Ulissi (Ògnina)

Dâ Wikipedia, la nciclupidìa lìbbira.
Lu purticeddu Ulissi di l'Ògnina di Catania

Lu portu Ulissi è lu purticeddu di l'Ògnina, ca è nu rioni a nodd-esti di Catania; e s'attrova situatu a li cuurdinati 37° 31',53 Nodd e 15° 07',27 Esti.

Lu portu Ulissi (ca a Catania si sapi sèntiri: u putticeddu i l'Ògnina) s'attrova nta la costa a nodd dâ cità di Catania ncavatu nta na nzinatura dâ scugghera làvica; stu portu asisteva nzinu di li tèmpura antichi. Ntâ zona unni s'attrova lu portu aoggi, calava nu ciumi chiamatu Lògnina (oppuru Uògnina) ca vinni vurricatu di na culata làvica di l'Etna ntâ l'èbbica mediuvali. Ntô 1381 lu burgu di Ògnina fu ntiramenti vurricatu dâ lava e di ddu portu anticu arristau sulu na nzinatura nicaredda ca è chidda ca videmu ora. Ntô portu anticu cc'èranu tanti canteri navali ca fabbricàvunu navi e pischirecci ccu mastri d'ascia canusciuti e stimati nta tuttu lu Miditirràniu. Lu portu di l'Ôgnina apprima era un purticeddu di piscatura ma ntô doppuguerra canciau alleggiu alleggiu attivitati, addivintannu nu portu turìsticu attrizzatu.

Stu portu s'attrova a tri migghia a nodd-esti dô Portu di Catania, è prutiggiutu di nu molu longu cchiossai di 150 metri e havi nû faru russu ppi signalazzioni 'n pizzu a tistata, nu molu nternu cchiù nicarreddu e na para di puntili galliggianti. Li funnala rucciusi sunnu di 1,5 a 7 metri di prufunnità.

Lu portu è attrizzatu ccu rifurnimentu di carburanti e acqua, canteri navali e quattru Gru di alàcciu. Ci s'attròvunu macari na para di Club nàutichi.

Ntâ littiratura siciliana[cancia | cancia la surgenti]

Ninu Martogliu fa na rifirenna a stu locu ntô sò puema: L'Opira 'e Pupi, chi havi stu suttatìtulu: ('ntra lu tiatrinu Machiavelli, all'Ugninedda). Stu nomu, Ugninedda, si tratta di n'àutru nomu pi Ògnina.

Galleria[cancia | cancia la surgenti]