Palora d'òrdini

Dâ Wikipedia, la nciclupidìa lìbbira.

Na palora d’òrdini, canusciuta macari cû nomu ngrisi di password, è na palora sigreta chi’ veni cunfidata ê cristiani chi’ fannu parti dûn certu gruppu chiusu. Li membri di stu gruppu sunnu tinuti a’ nun cumunicàrila a’ nuddu straniu. A’ sta manera, cu fa’ parti dû gruppu po’ virificari l’appartinenza di n’autru cristianu ô stissu gruppu, dumannànnucci la palora d’ordini.

Ô postu di na palora, si po’ adupirari macari na frasi o nu còdici.

L’usu dî palori d’òrdini nasci nta l’àmmitu militari: i surdati di guardia pònnu sapiri chi’ n’autru surdatu nun apparteni ô nnimicu, o pònnu cunfirmari chi’ havi ricivutu li stissi òrdini, spiànnucci a palora d’òrdini.

Lu ricanuscimentu pi’ menzu dâ palora d’òrdini po’ èssiri ricìprucu: cu ricivi la palora d’òrdini giusta po’ aviri a’ rispùnniri cu’ n’autra palora d’òrdini. A’ sta manera, tutti dui li parti ponnu èssiri sicuri chi’ nun rivilaru la palora d’òrdini ô nnimicu.

Pi’ èssiri efficaci, na palora d’òrdini s’havi a’ canciari spissu, di manera chi’ si’ lu nnimicu veni a’ canuscenza dâ palora, nun guadagna nu vantaggiu pirmanenti.

I palori d’òrdini ntâ nfurmatica[cancia | cancia la surgenti]

L’usu dî palori d’òrdini s’havi diffunnutu cû bbentu dî cumunicazzioni elittrònichi: nta sti cuntesti, cu adòpira un sirvizziu, ad esempiu nu situ web, spissu s’havi a’ fari ricanùsciri di cu gistìsci lu sirvizziu. Chistu pi’ evitari chi’ autri ponnu taliari li so dati risirbati o puru dari dispusizzioni a’ nomu soi. Pi’ stu mutivu, l’utenti dû sirvizziu, ntô mumentu chi’ apri un cuntu pirsunali mpressu lu gisturi dû sirvizziu, cci cunfida na palora d’òrdini. Di tannu in ppoi, ognin vota chi’ lu gisturi ricivi na richiesta a’ nomu di dd’utenti, cci dumanna la palora d’òrdini pi’ virificari chi’ la richiesta fu’ mannata pi’ davera di l’utenti e nun di nu straniu.

Pi’ maggiuri sicurizza, li gistura dî sirvizzî diggitali nun avìssuru a’ sarvari ntê so basi di dati na palora d’ordini pi’ com’è. Chistu picchì si’ la basi di dati veni viulata, lu ntrusu veni a’ canuscenza dâ palora, e po’ pruvari a’ adupiràrila nta autri sirvizzî a’ nomu dû stissu utenti, pruvucannu cchiu’ dannu quannu mmatti chi’ la palora d’òrdini era la stissa.

Pi’ chistu, ntê basi di dati è bona règula mimurizzari un còdici hash ottinutu dâ palòra d’òrdini salata chiuttostu chi’ la palora stissa. A’ sta manera lu gisturi nun canusci la palora iddu stissu, però po’ virificari si’ la palora chi’ cci fu’ data è chidda giusta. È chistu lu mutivu pû quali tanti siti web nun cunsèntunu a’ l’utenti di canùsciri la so palora d’òrdini quannu si la scòrdunu, ma cci dùnunu sulamenti la pussibbilità di canciàrila.