Lonci
Lonci (talianu: Longi) èni un paisi cu pressappocu 1500 animi in pruvincia di Missina (distanza dâ citàti: 120 km). Eni situatu a 630 metri supra lu mari. Lonci faci parti dî comuni dû "Parco dei Nebrodi" (Carunii in sicilianu). Pi jùnciri a Lonci di Missina (na ura e menza) o di Palermu (na ura e 40 minuti), s'havi a 'rrivari cu l'autostrata A20 a Rocca di Caprileone, e poi s'havi a proseguiri pâ provinciali versu Turturici chi, passannu di Caprileone, Mirtu e Frazzanò, porta direttamenti a Lonci. Di Catania inveci s'havi a proseguiri pi Rannazzu prima, poi pi Turturici e, passannu di Jalati Mamertinu s'arriva in pressappocu na ura e menza.
Studi recentissimi, appujati di l'Universitati di Palermu, dìcunu chi Lonci fu funnata direttamenti da certi diminniti (dâ citati di Demenna, capitali dâ Val Dèmuni) chi, fujènnusi di li saracini, scinneru a valli funnannu lu paisi. A partiri dû 1200 si hannu li primi notizzi scrivuti supra l'Universitati di Lonci, supra a certi reggi atti, unni si cumprenni chi na cinquantina di famigghi, un cunventu e carchi nòbbili campàunu 'nta l'attuali tirritoriu urbanu.
Economicamenti lu paisi èni assai attivu: sunnu diversi li fàbbrichi tèssili, èni prisenti na fitta riti di bed & breakfast e diversi ristoranti, furni, mulini e putìi òffrunu li cosi di casa genuini e tradizzunali.
Lu patronu dû paisi èni Santu Liu (talianu: San Leone), chi si festeggia lu 20 di frivaru e la prima dumìnica di maju. La festa chiù sintuta (ma sulu a livellu di partecipazioni, vistu lu periudu di vacanza) èni la festa dû Crucifissu, lu 22 e lu 23 d'agustu, unni veni però purtatu in prucissioni puru lu veneratissimu patronu Santu Liu.
Li tradizzioni sunnu ancora assai vivi. Pi Natali i picciotti da Nuvena nescunu tutti li notti, pi novi notti, a cantari i ninna nanni pû Bambineddu: ricivennu spitalità 'nte casi di paisani chi restunu vigghianti pi priparari li tavulati cu li rametti (durci tipicu luncitanu), vinu, cumpanaticu, sasizza sicca di purceddu niuru e tanti àutri prilibbatizzi tìpici di tutta la zona carunisi (talianu: nebroidea). Pi Pasqua èni caretterìstica a prucissioni dû gioveddì Santu, chî tìpici "Miserere" cantati.
Lu dittu: "Mirtu, Frazzano, Galati e Lonci, sunnu li quattru paisi di li funci" èni canusciutu pi tutta la Sicilia.