Lazarillo de Tormes

Dâ Wikipedia, la nciclupidìa lìbbira.
Fruntispizziu di La vida de Lazarillo de Tormes y de sus fortunas y adversidades

Lazarillo de Tormes (lu tìtulu urigginali 'n lingua spagnola è La vida de Lazarillo de Tormes y de sus fortunas y adversidades) è nu rumanzu anònimu spagnolu di cui nun si sapi di pricisu la data di quannu fu scrivutu. Li rifirimenti stòrichi ca cci sunnu misi sunnu picca e scarsi, quarchi liami si putissi fari ccu lu prisuntu erasimìsimu ca cumpari (spargiutu nti la Spagna ntra lu 1525 e lu 1539) e ca fa pinzari ca fu scrivutu avveri lu 1525. Cumunqui la data di pubbricazzioni nun pò jiri doppu lu 1550. Nti lu 1554 cci sunnu tri edizzioni pubbricati ntra cui una fatta a Burgos (chidda ca piaci cchiossai a li studiusi muderni e macari la cchiù vicina a l'urigginali), una a Alcalá de Henares e l'àutra ad Anversa (st'àutri cuntèninu agghiunti e rifacimenti ca nun cci sunnu nti l'edizzioni di Burgos). Lu libbru fu misu a l'Ìndici già nti lu 1559 picchì cunteni cuntinui citazzioni sacri a scopu satìricu, l'òpira è di n'auturi addutturatu ca pigghia elimenti sia di la tradizzioni pupulari e rialistica di li fabliau midivali e di la nuvillìstica, sia di la littiratura clàssica. Stu rumanzu è cunzidiratu l'òpira prima di la littiratura picaresca ca si sviluppau ntra lu XVI e lu XVII sèculu.

Lu rumanzu è scrivutu 'n prima pirsuna: è lu prutagunista ca parra, cuntannu li sò vinturi 'n manera quasi crunachista, senza cummenti o pinzamenti d'òrdini murali.

La fiura di Lazarillo, contra-eroi di classi, e li sò vicenni scunchiuduti ni fannu ntènniri la situazzioni di nun-cirtizza di la Spagna di Carlu V, vittima di na gravusa crisi ecunòmica e sinnata di li squilibbri suciali.

Lu picciottu è nu vagabbunnu ca addòpira milli maneri pp'attruvari di comu campari; sempri 'n viaju, sempri affamatu, nun si schifìa di usari sistemi fora-liggi ppi jiri avanti. Mpresta li sò sirvizzi a nu orvu, a nu scuteru, a nu mònacu ca smercia bulli papali, a nu pitturi di strata e a la finuta a nu arciparrinu, ppi cui si metti a fari lu vanniaturi di vini. Di stu ùrtimu si marita la serva, ca pirò hà cuntinuari a spartìrisi ccu lu sò patruni.