Gènciru

Lu Zingiber officinale (cchiù cumunimenti "gènciru" o "zenzeru") è na chianta ervàcia di la famigghia di li Zingiberaceae chi havi uriggini n Estremu Orienti. Curtivata ntâ zona trupicali, la sò carattiristica principali è lu grossu rizzoma carnusu e ramusu dunni nèsci nu fustu erettu e cavu, fogghi cu na forma di lanza e ciuri nichi giarnu–virdastri cu macchi purpura. Lu rizzoma è assai usatu n cucina pi nzapuriri li cibbi e comu ngridienti di nummarusi cunnimenti e sàusi esutichi. Chiossai cunteni na sfunnacata di principi attivi ca ci dunanu putenti prupitati midicinali. Nfatti lu gènciru è usatu nnî deti pì cummàttiri li artriti, lu culistirolu, li colichi ntistinali, la nàusea e formi di cardiupatii.