Discussioni:Sicilia (pristoria)

Dâ Wikipedia, la nciclupidìa lìbbira.
Jump to navigation Jump to search

Versu lu sèculu tridicèsimu a.C., prima di la distrutta di Troia, certi genti di l’Iberia sbarcaru nta li costi nord-uccidintali dâ Sicilia e accuminzaru a curtivari la terra e a organizzarisi ncumunità. Pirciò nun si trattau di n’accupazzioni ma di na migrazzioni, p'attruvari un postu megghiu e cchiù tranquillu. Ssi genti fôru chiamati Sicani, picchì si dici ca vinìanu di vicinu a lu ciumi Sicanu nta la pinìsula ibèrica e lu sò re, secunnu â tradizzioni, era Cocalu. Tucididi (sèculu V a.C.) dici ca li Sicani èranu un pòpulu urigginariu dâ Sicilia.

Cocchi tempu doppu n’autru gruppu di genti, a quantu pari, di l’Italia Cintrali,sbarcò puru nta li costi orientali di l’isula e li chiamaru Siculi, pigghiannu lu nomu di lu sò capu ca si chiamava Siculu. Duranti tuttu stu tempu parissi ca i Finici avissiru stabbilutu certi rapporti cummirciali cu l’abbitanti di l’isula e certi punti d’appoggiu pi lu cummerciu ca facianu to Meditirraniu e chi li greci avissiru visitatu l’isula chiossai di na vota. Si dici ca li Finici, un populu assai cchiù avanzato di civilizzazzioni, avissi datu pi la prima vota l'alfabbetu all’abbitanti di la Sicilia, un alfabbetu cumpostu sulu di vintidui cunsunanti, e a sti cunzunanti li greci cchiù appressu cci agghiunceru li vucali. Ma la storia propriamenti scritta nun accuminzò finu a lu V seculu a.C. E puru a stu puntu, parrannu sempri dû passatu, avemu sulu scarsi nutizzi supra la Sicilia, chi, comu si dissi, nni fôru dati di Tucididi quannu si ntirissò di la guerra di lu Peloponnesu. Mancu li Greci vinniru nta Sicilia cu lu ntentu di accupalla, nun vinniru cu n’asercitu armatu, ma, comu li sicani, fu un muvimentu di migrazzioni, duvutu a li duri cundizzioni di vita ntê sò nazzioni, causati di situazzioni pulitichi, ecomomichi e suciali. Nfatti appena sbarcati nta li costi orientali di l’isula, essennu genti cchiù avanzata in civilizzazzioni, espropriaru li terri a li Siculi e li cacciaru versu lu nternu di l’isula, facennunni un bon nummuru priciuneri pi usalli comu schiavi. La prima culunia greca fu Naxos, funnata ntô 750 a.C., mentri ntô 734 a.C., i Corinzi, cu a capu Archia, sbarcaru a Ortigia e funnaru un paiseddu chiamatu Siracusion, picchì era vicinu a na terra margiusa chiamata Siraca. Appressu nasciu Palazzolu Acreidi ntô 664 a.C. e Camarina ntô 598 a.C. Cu lu stissu nomu di lu ciumi Gela fu funnata la cità di Gela ntô 589 a.C. di un populu ca vinni di Creta e chi poi funnò Agrigentu (Akragas) ntô 581 a.C. L’unica culunia custruiuta di li greci nta la parti occidentali di l’isula fu Selinunti. Nzemmula a tutta sta genti, truvamu l’Elimi, un populu mistiriusu chi certuni dicinu ca sbarcaru ‘n Sicilia doppu a caduta di Troia e perciò profughi truiani ca, dicinu stanchi di viaggiari, nun vosiru siguiri cchiù a Enea, autri dicinu ca vinniru di l’Etruria, assicutati di l’etruschi; truvamu puru l’Ausoni nta l’isuli Pelagi chi vennu di diffirenti parti di l’Italia e, comu si dissi, li Finici chî sò avamposti comu punti d’appoggiu pi lu sò cummerciu nta lu Miditirraniu. Si dici ca fôru iddi ca funnaru Palermu.