Cummerciu di nivi di l'Etna

Lu cummerciu di nivi di l'Etna fu pi n'èbbica pre-innustriali n'attività chi cunsistìa a cògghiri la nivi dû vurcanu, e traspurtàrila a Catania e vinnìrila. Cummerci sìmili ci foru 'n tèmpura pre innustriali ntî ogni parti dû munnu unni lu ghiacciu a causa dû clima è raru e la prisenza di muntagni vicini pirmetti stu tipu di attività, comu p'asèmpiu 'n Iran unni ggià ntô mediuevu li genti si fidàvanu a traspurtari lu ghiacciu nzinu ô disertu, o a Pariggi unni ancora ntô XIX sèculu si vinnìa ghiacciu cugghiutu 'n Svìzzira.

Nutizzi rilativi ô cummerciu dâ nivi di l'Etna

Sti nutizzij sutta arripurtati vènunu di nu libbru scrittu ntô 1909 dô giòlucu franzisi Lacroix sùpira l'erruzzioni di l'Èttina dô 1908 e ca vènunu ccà arripurtati e traduciuti 'n lingua Siciliana.

Cugghiuta dâ nivi nta l'Etna

L'Èttina

La nivi s'arricogghi idda stissa nta granni nzinaturi, ditti tacchi, di unni veni livata cu na serij di upirazzioni. La prima di st'upirazzioni veni fatta ntô misi di uttùviru, unni si pulizzìanu li tacchi, livari li petri ca ci avìssuru cascatu d'intra, e li fogghi e la lurdìa c'arristau dopu la cugghiuta dâ nivi di l'annu apprima. Dopu, quannu li tacchi s'hann'a incutu di nivi dâ mmirnata, ntô misi di marzu na squatra di 50 o 60 upirai si ni và ntâ muntagna e, azziccannu asti longhi di ferru, cuntrolla l'autizza dâ nivi; di ora s'accumencia lu travagghiu dâ priparazzioni dô scavu, ca veni fattu sulu ntê zoni unni la nivi è àuta non cchiù picca di tri metri. Lu scavu veni fattu di notti, pirchì iddu arrisurtassi troppu faticusu di jornu, quannu lu suli fà squagghiari la supirfici nivusa. Cû lustru dâ luna e dê làmpari a pitròliu, l'upirai cummògghiunu la supirfici dâ zona di unni s'hà scavari cu nu solu di cìnniri àutu 30 cintìmitri, mentri ca ntô bordu veni misa cìnniri pô dùppiu; lu scopu di ssa cupirtura è chidda d'addifènniri la nivi dô suli. Nta ssa manera si pripàranu , a secunnu di l'abbunnanzia dâ nivi, quattru o cincu tacchi ca vènunu assignati a nu mprindituri, ca si lassa la citati di Catania senza nivi, hà pajari na pena granni di sordi.
Quannu arriva â stati, si sbarazza la cìnniri dâ nivi e appoi si sparti la supirfici nta na riti di tanti rittànculi funnuti nzinu a nu metru e menzu, sirvènnusi di strumenti di ferru. Duranti lu jornu, tanticchia di nivi si squagghia, l'acqua ca si furma trasi intra li sorchi e chista ntâ notti ca veni si cungela: nta ssa manera, la nivi pò èssiri spartuta nta blocchi parallelipìpidi chê facci cungilati. Sti blocchi vènunu tutti ammugghiati cu fogghi di felci e di castagnu e misi intra sacchi, ca, misi a dui pi ogni mulu, vènunu scinnuti a Catania e spartuti ddocu e ntê cità vicini.

Lu cunsumu dâ nivi ntâ Sicilia

N'àutru franzisi, J. Hoüel, ntô 1777 diceva ca lu cummerciu dâ nivi di l'Etna mpignava migghiara di muli, di cavaddi e òmini; essennu granni assai-assai lu cunsumu di idda nta tutta l'Ìsula, unni nuddu sapeva privarisinni. L'usu d'arrifriddari li vìppiti si pinzava ndispinzàbbili pi la saluti e la caristìa dâ nivi cunzidirata cû stissu dannu di chidda dû vinu e di l'ogghiu. Cunta sempri J. Hoüel ca, truvànnusi a Sarausa nta un jornu di caristìa di nivi, e passannu pri mari na varca càrica di nivi, li sarausani curreru a l'arrimbaggiu e custrìnsiru la cunsegna dû càricu: ô rifiutu di l'equipaggiu, passaru a gravi viulenzi, cu la pèrdita di arcuni di iddi ntô cunfrittu. (Hoüel,op.cit.,t.II,p.82)

Brydone videva nta l'usu di l'acqua fridda lu cchiù granni e forsi lu cchiù salutari ntra tutti li lussi dâ Sicilia e suttaliniava cu piaciri la pràtica dê mèdici siciliani di dari di idda na granni quantitati a lu malatu di nfiammazzioni. (Brydone, op.cit.,lett.XXXIII)

N'àutru ngrisi, Irvine, ntô tempu ca stetti ntra nuatri, arristau sempri surpresu dâ manìa dê Siciliani pê cosi friddi: raggiuni di li cchiù ardenti disiderî comu lu "gin" pi li "pescivendole" ngrisi. - Ci n'èranu spacci unni ègghè. Genti pòvira, macari cinciusa, attruvava lu sò bajoccu pri accattarasinni, e cui è ca lu puteva fari, s'agghiacciava li vìppiti 'n casa. Lu scrusciu c'avvineva d'avanti a li negozzî di nivi arrivata di picca di l'Etna, pigghiava caràttiri di veru tumultu, picchì chisti vinèvanu assartati di na fudda scumpigghiata, ca pi nu furasteri pareva si facissi n'omicidiu. ( W.Irvine, Letters on Sicily, pp. 28–30. London, 1813)