Clàusula d'apirtura

Dâ Wikipedia, la nciclupidìa lìbbira.
Jump to navigation Jump to search

La clàusula d'apirtura è n'istitutu di dirittu dû travagghiu, viggenti n paisi comu Spagna e Girmania. Si ntenni comu na spicifica clàusula dû cuntrattu cullittivu nazziunali ca apri a dìrui in peius, supra la banna ecunòmica e salariali dâ cuntrattazzioni cullittiva, nti lu cuntrattu azzinnali pi jiri cuntra crisi ecunòmichi o appressu a mumenti mpurtanti dâ vita e dâ crisciuta di la mprisa. N Italia nun è asplicitamenti e juridicamenti ammintuatu, pirò è prividutu acchiccosa dû gèniru nti l'accordu dû 22 di jinnaru 2009 (nun firmatu di la CGIL).

S'havi a diri pirò ca puru siddu lu cuntrattu cullittivu nazziunali nun prividi nenti, certi dìrui a li istituti dû cuntrattu cullittivu ponnu èssiri fatti di li cuntratti azzinnali supra â basi dû dirittu sinnacali. Chissu picchì a liveddu di la cuntrattazzioni salariali la jirarchìa ntra cuntrattu nazziunali e azzinnali è di tipu puliticu-sinnacali, nun juridica. Ergu puru siddu nun cci sunnu clàusuli d'apirtura lu cuntrattu azzinnali putissi assai bonu diruari in peius trattamenti di lu cuntrattu cullittivu, vistu ca lu judici stissu dici ca la ritribbuzzioni sufficenti nun è lu minimu salariali dû cuntrattu nazziunali ma zoccu stabbilisci iddu, n basi a situazzioni ecunòmichi e suciali dû locu, dû piriudu e dâ mprisa.