Arba Sicula

Dâ Wikipedia, la nciclupidìa lìbbira.
(Rinnirizzata di Arba Sìcula)

Arba Sicula é na sucitati ntirnazziunali senza scopu di lucru chi havi comu lu sò ubbittivu a abbanniari, difúnniri e prisirbari la lingua e la cultura siciliana. Lu sò ufficiu principali s'attrova a Nova York ntê Stati Uniti. La maiuranza dî sò soci campa ntê Stati Uniti videmma.

Arba Sicula pùbbrica n'edizzioni dû sò libbrinu omònimu ogni annu (viditi â manu dritta), e dui voti ogni annu pùbbrica la rivista Sicilia Parra. Tutti dui vennu pubbricati pi sicilianu e pi ngrisi e cuntèninu puisìa, saggìstichi e nutizzî dâ Sicilia e dâ cumunitati siculu-miricana. È puru na libbrarìa, pubbricannu libbra chi si tràttanu di ogni quistioni siciliana e/o chi sunnu scrivuti pâ lingua siciliana.

Lu disignu dâ facci dû libbrinu é pigghiatu di na midagghia d’urnamentu chi cunteni na speci di cruci dicurativa. N'asempiu s'attrova ntô Museu di Siracusa. Fu attruvata a San Cataldu e fa parti di l’Adrano Hoard, la cchiú granni cugghiuta d’uggetti di brunzu chi fu mai attruvatu 'n Sicilia. Lu disignu é di circa 1.300 anni avanti Cristu, dâ civirtati Sicula.

Lu prisidenti d'Arba Sicula (e edituri dû libbrinu) pi na vintina d'anni fu lu Prufissuri Caitanu Cipudda. Iddu nzigna â St John's University a Nova York e scrivìu tanti libbra dâ lingua siciliana e dâ cultura siciliana e traducìu la puisìa dî granni scrittura siciliani comu Giuvanni Meli e Ninu Martogliu.

Liami sterni[cancia | cancia la surgenti]