Munti Nèbbrudi

Dâ Wikipedia, la nciclupidìa lìbbira.
(Rinnirizzata di Munti Nebbrodi)
Unni s'attrova lu Parcu Naturali Riggiunali dî Nèbbrudi

Li Munti Nèbbrudi, ditti puru Carunìi, s'attròvanu nta l'ìsula di Sicilia, nnê pruvincî di Missina, Enna e Catania. Nzèmmula a li Madunìi, a ovest, e a li Piluritani, a est, custituìscinu l'Appenninu Sìculu. Sunnu dilimitati a sud di na parti di lu ciumi Simetu, a ovest dû ciumi Pòllina e a est dâ ciumara di Nuvara di Sicilia.

Li cimi cchiù mpurtanti sunnu: Munti Soro (1847 mt.), Serra dû Re (1754 mt.), Pizzu u Fau (1686 mt.), Serra Pignataru (1661 mt.), Munti Triarî (1600 mt.), Munti Casteddi (1566 mt.) e Munti Sambuchetti (1558 mt.).

Lu nomu Nèbbrudi veni dû grecu nebros ca voli diri "cerbiattu". Nfatti, na vota nta sti muntagni si putìanu attruvari cervi, dàini, lupi e puru ursi.

La zuna dî Munti Nèbbrudi oji è na zuna naturali prutetta: dû 4 di austu1993 esisti lu Parcu Naturali Riggiunali dî Nèbbrudi, granni 85.687 èttari, ntô tirritoriu di 21 cumuni; è spartutu nta 4 zuni nnê quali, a secunna di l’intiressi naturalìsticu, esìstinu varî diveti.