Ciuri ciuri

Ciuri Ciuri è cu Vitti na crozza, forsi la canzuna pupulari siciliana cchiù cèlibbri. Li virsioni esistenti nun si cùntunu. I "Ciuri" (talianu: fiori, cu na maniata di equivalenti 'nto Laziu, Toscana e Salentu) sunnu semplicimenti sturnedda e lu testu varia di zona in zona arricchennusi certuni voti di strofi di travagghiu, d'abbandunu e d'amuri. Origginariamenti li strofi erunu sulu d'abbandunu, vinennu cantati pi lassari n'amanti o pi fari screzziu (non sempri schirzusu) a la propria mugghieri o zita propriu o cuntrè di na sirinata (ciuri di rosi russi, a lu sbucciari: amaru a l'omu ca e fimmini cridi...), pi suttuliniari dilusioni e pinijamenti d'amuri.

Vari virsioni esistunu. Eccu li strofi chiu canusciuti:

Lu sabatu si sapi allegra cori
beatu cu avi bedda la mugghieri,
cu l'avi bedda ci veni lu cori
cu l'avi laria ci mori lu cori

Rit: ciuri ciuri ciuri di tuttu l'annu
l'amuri ca mi dasti ti lu tornu
ciuri ciuri ciuri di tuttu l'annu
l'amuri ca mi dasti ti lu tornu
la la lalala' lalalalalala

si troppu dispittusa tu cu mia
cascu ru lettu si m'insonnu a tia
si laria 'nta la facci e 'nta lu cori
cu tia ju nun mi vogghiu maritari

rit.

ciuri di rosi russi a lu sbucciari
amara a cui li tò paroli criri
l'omini siti tutti munsignari
jù non ti vogghiu no! Ti nni pò iri

rit.

Ciuri di rosi russi a lu sbucciari,
amara a l'omu c'a fimmini criri,
amara a cu si fa supraniari
lustru di Paradisu non ni viri.

rit.

la me vicina e' vucera pazza
nun si la chiuri mai la so vuccuzza
nun si la chiuri mancu si s'ammazza
conzala comu voi sempri e' cucuzza

rit.

chiu' ti taliu chiu' diventu siccu
mi sentu cu la testa dintra un saccu
pi veni' appress'a tia persi lu sceccu
e ora comu fazzu a cu accavarcu

rit.

mi pozzu strarriari cu me matri
picchi' mi fici accussi curtulidda
li longhi sunnu tutti strarrieri
li curti sunnu di zuccaru e meli

rit.

aiu 'na zita ca si chiama nedda
bedda di facci ma senza mirudda
ci dissi mi la dai 'na vasatedda
mi dissi no picchi' manciai cipudda

rit.

ciuri di gersuminu rampicanti
si tu di notti a mia cantari senti
nun cantu n'e' p'amuri n'e' p'amanti
ma sulu pi svariarimi la menti

rit.

me soggira mi dici va travagghia
nun fari mali patiri a me figghia
quannu t'a detti eu era na quagghia
ora l'arriducisti na rarigghia.