Turiddu picchì cchiànci

Dâ Wikipedia, la nciclupidìa lìbbira.
Jump to navigation Jump to search

Stu jocu vinìa fattu principarmenti di li picciriddi. Speci nta la stati, nta li strati e li curtigghi, s'accuminzava a jucari ntô primu pumiriggiu e si cuntinuava pi uri e uri nsinu â sira, finu a quannu li matri chiamàvanu li figghi pi manciari.

Tutti li picciriddi fannu nu cìrculu tinènnusi pi li manu.
Nu picciriddu sta a lu centru e n’àutru sta fora dô girutunnu e gira sartillannu ntornu a lu cìrculu, facennu finta di chiànciri; lu picciriddu ca sta ntô centru lu chiama:
Turiddu, picchì-cchiànci?

A nanna mi-nni mannavu (Rispunti Turiddu)

Ci vòi stari cu-mmìa? ( dici l’autru picciriddu)

Cchi-mmi runa vossìa? (Turiddu)

Ti rugnu na vastedda o iòrnu
e n càuci a-mmanziòrnu! (l'autru)

Pu… i… i… i… ! (Chianci Turiddu)


Chista situazzioni s’arripeti diversi voti; pi ogni giru attornu a lu cìrculu, li ufferti di la vastedda aumèntanu di unu ogni vorta finu a quannu lu picciriddu ca sta intra a lu cìrculu cangia la sò ufferta nta stu modu:

Turiddu, picchì-cchiànci?

A nanna mi-nni mannavu!

Ci vòi stari cu-mmìa?

Cchi-mmi runa vossìa?

Ti rugnu cincu vasteddi o iòrnu
e m-bàciu a-mmanziòrnu!
Si, cci stàiu tuttu cuntenti
e-ttutti l'àutri iànu
a sputazza ne renti

Agghicati a stu puntu dô jocu, lu picciriddu ca sta fora dô girutunnu accuminza a cùrriri e dici:

Pugnu cutugnu
amar'a-ccu cci u rugnu
cci u rugnu a-mme mugghièri
ca è-ffigghia ri cavaleri!

e ci duna nu pugnu ntâ carina a n'àutru picciriddu ca fa lu girutunnu: chistu, appena ricevi lu pugnu, si metti a cùrriri, e curri macari lu picciriddu ca desi lu pugnu, ma nta l'àutru versu: cu arriva pi primu a pigghiari lu postu lassatu vacanti, trasi a fari parti di lu girutunnu, mentri l’àutru fa la parti di Turiddu.

E lu jocu ripigghia d'accapu.