San Sergiu Papa di Palermu

San Sergiu di Palermu ( Palermu, ? – Roma, 701 )

Sergiu nasciu a Palermu no VI seculu, di patri e matri di origini siriana. U Papa Adeodatu II u fici trasiri na Cresia Rumana, unni fici parti da “ Scola di Cantura “, addivinendu spertu di cantu liturgicu, suprintendenti di cimiteri e ci fu affidata a Cresia di Santa Susanna. Fu apprizzatu assai pa so modestia e virtuti. Quannu fu ura di eliggiri u Papa, c’eranu du gruppa; unu guidatu du Viscuvu di Ravenna e l’avutru du cleru rumanu; i primi vulevanu l’arcidiacunu Pasquali, l’autri l’arcipreti Teodoru. Ma no 687 fu elettu Sergiu e fu l’ottantacinquesimu Papa. U ‘Mperaturi Giustinianu II vuleva ca u Papa accittassi i dicisioni du Cunciliu Trullanu specialmenti pu Dirittu Canonicu orientali e fari accussì du Papa unu cuntrullatu di Bisanziu. Sergiu nun accunsintiu. U ‘ Mperaturi mannau u protuspatariu Zaccaria di Ravenna pi arristallu, ma u Populu Rumanu ‘nsurgiu e addifinniu o Papa. U so puntificatu durau 14 anni ( du 687 o 701) e na stu periudu arricchiu i Cresi di Roma, fici fari un munumentu a San Liuni Magnu quannu fici trasportari u corpu du sagratu da Cresia dintra a Basilica di San Petru; appi a cummattiri l’eresia da simunia, vali a diri accattari i cosi sacri chi picciuli. Purtau a paci no Patriarcatu di Aquileia unni foru cuntrarii o Papa pi 140 anni. No 688 arrivau a Roma u re du Wessex Ceadwalla, ca addumannau o Papa di addivintari cristianu; u Papa u vattiò na Basilica du Latranu e ci misi nomu Petru. Vosi ca na Santa Missa si cantassi pi tri voti “ Agnus Dei “, vali a diri Agneddu di Diu e istituiu 4 Prucissioni a Roma pi festi da Madonna. Muriu l’8 Settemmiri du 701 e fu sippillutu a San Petru. E’cilibratu u 9 di Settemmiri na Citati di Palermu, comu Patronu sicunnariu.