Statutu d'autonumìa sicilianu

STATUTU DI AUTONUMÌA DI LA RIGGIONI SICILIANA

Appruvatu cu R.D.L. 15 maiu 1946, n.455.

(Pubbricatu nta la G.U. di lu Regnu d'Italia n. 133-3 di lu 10 giugnu 1946)

Cunvirtitu 'n Liggi Custituzziunali lu 26 Frivaru dû 1948».

(Pubbricatu nta la G.U. di la Ripubbrica n. 58 dû 9 marzu 1948) ARTÌCULU 1

La Sicilia, cu li ìsuli Eolî, Ègadi, Pilaggî, Ùstica e Pantilleria, è custituita 'n Riggioni autònuma, furnita di pirsunalità giurìdica, intra l'unità pulìtica di lu Statu talianu, supra la basi di li principi dimucràtici ca ispìranu la vita di la Nazzioni. La citati di Palermu è lu capulogu di la Riggioni.

TÎTULU I Òrgani di la Riggioni ARTÌCULU 2

Ôrgani di la Riggioni sunnu: l'Assimbrea, la Giunta e lu Prisidenti riggiunali. Lu Prisidenti Riggiunali e la Giunta custituisciunu lu Cuvernu di la Riggioni.

SIZZIONI I Assimbrea riggiunali ARTÌCULU 3

L'Assimbrea riggiunali è custituita di novanta Diputati aletti nta la Riggioni a suffraggiu univirsali direttu e sicretu, secunnu la liggi emanata di l'Assimbrea riggiunali 'n basi a li principi fissati di la Custituenti 'n materia di alizzioni pulìtichi. Li Diputati rapprisèntanu l'intera Riggioni e spèrdunu di dirittu di la càrica a lu passari di quattru anni. La nova Assimbrea veni cunvucata da lu Prisidenti riggiunali intra tri misi di ssa spirduta di càrica.

ARTÌCULU 4

L'Assimbrea riggiunali aliggi nto sò nternu lu Prisidenti, dui Vici Prisidenti, li Sicretari di l'Assimbrea e li Cummissioni pirmanenti, secunnu li normi di lu sò riculamentu nternu, ca cunteni macari li dispusizzioni pi l'asircizziu di li funzioni spittanti a l'Assimbrea riggiunali.

ARTÌCULU 5

Li Diputati, apprima d'èssiri ammisi nta l'asircizziu di li funzioni, prèstanu nta l'Assimbrea lu giuramentu di asercitàrili cu lu sulu scopu di lu beni nsipiràbbili di l'Italia e di la Riggioni.

ARTÌCULU 6

Li Diputati nun sunnu sindacàbbili pi li voti dati nta l'Assimbrea riggiunali e pi l'opinioni ditti nta l'asercizziu di li funzioni d'iddi stissi.

ARTÌCULU 7

Li Diputati hannu lu dirittu di ntirpillanza, di ntirrugazzioni e di muzzioni d'intra a l'Assimbrea.

ARTÌCULU 8

Lu Cummissariu di lu Statu di cui a l'art. 27 pò pruporri a lu Cuvernu di lu Statu lu sciugghimentu di l'Assimbrea riggiunali pi cuntìnui viulazzioni di lu prisenti Statutu. Lu dicretu di sciugghimentu hà èssiri pricidutu di la dilibbirazzioni di l'Assimbrei liggislativi di lu Statu. L'urdinaria amministrazioni di la Riggioni è dunca data a na Cummissioni straurdinaria di tri membri, numinata di lu Cuvernu nazziunali supra l'addisignazzioni di li stissi Assimbrei liggislativi. Ssa Cummissioni ndici li novi alizzioni pi l'Assimbrea riggiunali nta lu tempu di tri misi.

SIZZIONI II Prisidenti riggiunali e Giunta riggiunali ARTÌCULU 9

Lu Prisidenti riggiunali e li Assissuri sunnu aletti di l'Assimbrea riggiunali nta la sò prima assittata e nta lu sò nternu a maggiuranza assuluta di voti sicreti di li Diputati. La Giunta riggiunali è cumposta di lu Prisidenti riggiunali e di l'Assessuri. Chisti sunnu priposti da lu Prisidenti riggiunali a ùnichi rami di l'Amministrazioni.

ARTÌCULU 10

Lu Prisidenti riggiunali 'n casu ca manca o è mpiditu veni sustituitu di l'Assessuri di iddu addisignatu. Nto casu di dimissioni, ncapacità, o morti di lu Prisidenti riggiunali, lu Prisidenti di l'Assimbrea cùnvuca intra chìnnici jorna l'Assimbrea pi l'alizzioni di lu novu Prisidenti riggiunali.

TÌTULU II FUNZIONI DI L'ÒRGANI RIGGIUNALI SIZZIONI I Funzioni di l'Assimbrea Riggiunali ARTÌCULU 11

L'Assimbrea riggiunali veni cunvucata di lu sò Prisidenti 'n sissioni urdinaria nta la prima simana di ogni bimestri e, straurdinariamenti, a dumanna di lu Cuvernu riggiunali, o di armenu vinti Diputati.

ARTÌCULU 12

L'anizziativa di li liggi riggiunali ci aspetta a lu Cuvernu e a li Diputati riggiunali. Li pruggetti di liggi sunnu alabburati di li Cummissioni di l'Assimbrea riggiunalu cu la participazzioni di la rapprisintanza di li ntiressi prufissiunali e di l'òrgani tecnici riggiunali. Li rigulamenti pi l'asecuzzioni di li liggi furmati di l'Assimbrea riggiunali sunnu prudotti di lu Cuvernu riggiunali.

ARTÌCULU 13

Li liggi appruvati di l'Assimbrea riggiunali e li rigulamenti fatti di lu Cuverno riggiunali nun sunu pirfetti si mancanu di la firma di lu Prisidenti riggiunali e di li Assissuri cumpitenti pi materia. Sunnu prumulgati di lu Prisidenti riggiunali passati li tèrmini comu di l'art. 29, cumma 2 , e pubbricati nti la "Gazzetta Ufficiali di la Riggioni" . Tràsunu 'n viguri nta la Riggioni chìnnici jorna doppu la pubbricazioni, sempri ca nun c'è àutra dispusizzioni, cumpresa nta la sìncula liggi o nta lu sìnculu rigulamentu.

ARTÌCULU 14

L'Assimbrea, nta l'àmbitu di la Riggioni e nta li lìmiti di le liggi custituzzionali di lu Stato, senza priggiudizziu di li rifurmi agrarii e nnustriali dilibbirati di la Custituenti di li pòpulu talianu, havi la liggislazioni asclusiva supra sti materii: a) agricurtura e furesti; b) bunifica; c) usi cìvichi; d) nnustria e cummerciu, a parti la discipplina di li rapporti privati; e) ncrimentu di la pruduzzioni agrìcula e nnustriali: valurizzazioni, distribuzioni, difisa di li prudotti agrìculi ed nnustriali e di l' attivitati cummirciali; f) urbanìstica; g) tavagghi pùbbrici, tranni li granni òpiri pùbbrichi di ntiressi privalentimenti nazziunali; h) mineri, cavi, turbieri, salini; i) acqui pùbbrichi, si nun sunnu uggettu di òpiri pùbbrichi di ntiressi nazziunali; l) pisca e caccia; m) pùbbrica binificenza e òperi pii; n) turìsimu, viggilanza arbirghera e tutela di lu paisaggiu; cunsirvazzioni di l'antichitati e di li òperi artìstichi; o) riggimi di li enti lucali e di li circuscrizzioni rilativi; p) urdinamentu di l'uffici e di l'enti riggiunali; q) statu giurìdicu e ecunòmicu di li mpiecati e funzionari di la Riggioni, nta ogni casu nun menu di chiddu di lu pirsunali di lu Stato; r) struzzioni elemintari, musei, bibbriotechi, accademii; s) asprupiazzioni pi pùbbrica utilità.

ARTÌCULU 15

Li circuscrizzioni pruvinciali e l'òrgani e enti pubbrici ca ni dirìvanu sunnu suppressi nta lu tirritoriu di la Regione siciliana. L'urdinamentu di l'enti lucali s'abbasa nta la Riggioni stissa supra li cumuna e supra li lìbberi Cunsorzi cumunali, dutati di la cchiù granni autunumia amministrativa e finanziaria. Nta lu quatru di ssi principi ginerali ci aspetta a la Riggioni la liggislazzioni asclusiva e l'asicuzioni diretta 'n materia di circuscrizzioni, urdinamentu e cuntrollu di l'enti lucali.

ARTÌCULU 16

L'urdinamentu amministrativu di l'artìculu pricidenti sarà rigulatu, 'n basi a li principi stabbiliti nta lu prisenti Statutu, di la prima Assimbrea riggiunali.

ARTÌCULU 17

Entru li lìmiti di li principi e ntiressi ginirali unni si nfurma la liggislazzioni di lu Stato, l'Assimbrea riggiunali pò, pi suddisfari a li cundizzioni particulari e a li ntiressi di la Riggioni, fari liggi, macari rilativi a l'urganizzazioni di sirvizi, supra li materii c'arriquardanu la Riggioni: a) cumunicazioni e trasporti riggiunali di tutti li gèniri; b) iggieni e sanità pùbbrica; c) assistenza sanitaria; d) struzioni media e univirsitaria; e) discipprina di lu crèditu, di li assicurazioni e di lu risparmio; f) liggislazzioni suciali: rapporti di travagghiu, prividenza e assistenza suciali, ussirvannu li mìnimi stabbiliti di li liggi di lu Statu; g) annona; h) assunzioni di pubbrici sirvizi; i) tutti l'àutri materii ca mplìcanu sirvizi di privalenti ntiressi riggiunali.

ARTÌCULU 18

L'Assimbrea riggiunali pò emèttiri voti, furmulari pruggetti supra materii di cumpitenza di l'òrgani di lu Statu ca ponnu ntirissari la Riggioni, e prisintàrili a l'Assimbrei liggislativi di lu Statu.

ARTÌCULU 19

L'Assimbrea riggiunali, nun cchiù tardu di lu mesi di Jinnaru, appruva lu bilanciu di la Riggioni pi lu pròssimu novu asircizziu, pridispostu di la Giunta riggiunali. L'asercizziu finanziariu havi la stissa dicurrenza di chiddu di lu Statu. A l'appruvazzioni di la stissa Assimbrea è macari suttapostu lu rennicunto ginerali di la Riggioni. SEZIONE II Funzioni del Presidente e della Giunta regionale.

ARTÌCULU 20

Lu Prisidenti e li Assissuri riggiunali, ortri a li funzioni asircitati 'n basi a li artìculi 12, 13 cumma 1 e 2; 19 cumma 1, svorgiunu nta la Riggioni li funzioni asecutivi e amministrativi cuncirnenti li materii di cui a li artìculi 14, 15 e 17. Sùpira autri nun cumpresi nta l'artìculi 14, 15 e 17 svorgiunu n'attività amministrativa secunnu li dirittivi di lu Cuvernu di lu Statu. Iddi sunnu rispunzabbili di tutti li funzioni d'iddi stissi, nta li cunfrunti di l'Assimbrea riggiunali e di lu Cuvernu di lu Statu.

ARTÌCULU 21

Lu Prisidenti è Capu di lu Cuvernu riggiunali e rapprisenta la Riggioni. Iddu rapprisenta macari nta la Riggioni lu Cuvernu di lu Statu, ca pò pirò mannari timpurraniamenti sò cummissarii pi la esplicazziuni di ùnichi funzioni statali. Cu rangu di Ministru partècipa a lu Cunsigghiu di li Ministri cu votu dilibbirativu nta li materii ca ntiressanu la Riggioni.

ARTÌCULU 22

La Riggioni havi dirittu di participari cu nu sò rapprisintanti, numinatu da lu Cuvernu riggiunali, a la furmazzioni di le tariffi firroviarii di lu Statu e a la istituzzioni e regulamintazioni di li sirvizzi nazziunali di cumunicazzioni e trasporti, tirrestri, marittimi ed aerii, ca ponnu cumunqui ntirissari la Riggioni.

TÌTULU III ÒRGANI GIURISDIZZIUNALI

ARTÌCULU 23

L'òrgani giurisdizziunali cintrali avrannu n Sicilia li rispittivi sizzioni pi l'affari cuncirnenti la Riggioni. Li Sizzioni di lu Cunsigghiu di Statu e di la Corti di li cunti svurgirannu macari li funzioni, rispittivamenti, cunsultivi e di cuntrollu amministrativu e cuntabbili. Li maggistrati di la Corti di li cunti sunnu numinati, di accordu, di li Cuverni di lu Statu e di la Riggioni. Li ricursi amministrativi, avanzati 'n linia straurdinaria contru atti amministrativi riggiunali, vènunu dicisi di lu Prisidenti riggiunali, sintuti li Sizzioni riggiunali di lu Cunsigghiu di Statu.

ARTÌCULU 24

È stituita a Roma n'Àuta Corti cu sei membri e dui supprenti, ortri lu Prisidenti e lu Prucuraturi ginirali, numinatu 'n pari nùmmiru di li Assimbrei liggislativi di lu Statu e di la Riggioni, e scigghiuti tra pirsuni di spiciali cumpitenza 'n materia giuridica. Lu Prisidenti e lu Prucuraturi ginirali sunnu numinati di la stissa Àuta Corti. L'òniri finanziariu riguardanti l'Àuta Corti è spatutu nta stissa misura tra lu Statu e la Riggioni.

ARTÌCULU 25

L'Àuta Corti giùdica supra la custituzzionalità: a) di li liggi fatti di l'Assimbrea riggiunali; b) di li liggi e di li riculamenti fatti di lu Statu, 'n cunfrontu a lu prisenti statutu e a li fini di l'afficacia di li midèsimi intra la Riggioni.

ARTÌCULU 26

L'Àuta Corti giùdica macari supra li riati fatti di lu Prisidenti e di l’Assissuri riggiunali nta l'asircizziu di li funzioni comu a lu prisenti statutu, e accusati di l'Assimbrea riggiunali.

ARTÌCULU 27

Nu Cummissariu, numinatu di lu Cuvernu di lu Statu, prumovi nta l'Àuta corti li giudizzi comu dìciunu l'artìculi 25 e 26 e, ‘n st'ùrtimu casu, macari ‘n mancanza di accusi di l'Assimbrea riggiunali.

ARTÌCULU 28

Li liggi di l'Assimbrea riggiunali sunnu amannati intra tri jorna di l'appruvazioni di lu Cummissariu di lu Statu, ca intra li cincu jorna doppu pò mpugnàrili d'avanti a l'Àuta Corti.

ARTÌCULU 29

L'Àuta Corti dicidi supra li mpugnazzioni intra vinti jorna di la ricivuta di li midèsimi. Trascursi ottu jorna, senza ca a lu Prisidenti riggiunali ci havi arrivatu la copia di la mpugnazzioni, o megghiu passati li trenta jorna di la mpugnazzioni, senza ca a lu Prisidenti riggiunali ci havi arrivatu di l'Àuta Corti sintenza di annullamentu, li liggi sunnu prumulgati e mmidiatamenti pubbricati nta la Gazzetta Ufficiali di la Riggioni.

ARTÌCULU 30

Lu Prisidenti riggiunali, macari supra lu votu di l'Assimbrea riggiunali, e lu Cummissariu comu dici l'art. 27, ponnu mpugnari pi ncustituziunalità d'avanti a l'Àuta Corti li liggi e li rigulamenti di lu Stati, intra trenta jorna di la pubbricazzioni.

TÌTULU IV Polizzìa. ARTÌCULU 31

Pi lu mantinimentu di l'òrdini pubblrcu pruvvedi lu Prisidenti riggiunali pi mezzu di la polizzia di lu Statu, ca nta la Riggioni addipenni pi discipprina,, pi l'utilizzu, di lu Cuvernu riggiunali. Lu Prisidenti di la Riggioni pò addumannari l'utilizzu di li Forzi armati di lu Statu. Pirò lu Cuvernu di lu Statu pò pigghiari la direzzioni di li sirvizzi di pubbrica sicurizza, a dumanna di lu Cuvernu riggiunali, anzemi a lu Prisidenti di l'Assimbrea e,’n casi eccizziunali, di propria nizziativa, quannnu sunnu cumprumissi lu ntiressi ginirali di lu Statu e la sò sicurizza Lu Prisidenti havi macari lu dirittu di pruporri, cu richiesta mutivata a lu Cuvernu cintrali, la rimuzzioni o lu trasfirimentu fora di l'Ìsula, di li funzionari di polizzìa. Lu Cuvernu riggiunali pò urganizzari corpi spiciali di polizzìa amministrativa pi la tutela di particulari sirvizzi e ntiressi.

TÌTULU V Patrimoniu e finanzi. ARTÌCULU 32

Li beni di dimaniu di lu Statu, cumprisu l’acqui pubbrichi asistenti nta la Riggioni, sunnu assignati a la Riggioni, tranni chiddi ca ntirèssanu la difisa di lu Statu o sirvzzi di caràttiri nazziunali.

ARTÌCULU 33

Sunnu macari assignati a la Riggioni e custituìsciunu lu sò patrimoniu, li beni di lu Statu oggi asistenti nta lu tirritoriu di la Riggioni e ca nun sunnu di la speci di chiddi nnicati nta l'artìculi precidenti. Sunnu parti di lu patrimoniu nun dispunìbbili di la Riggioni: li furesti, ca a norma di li liggi ‘n materia custituìsciunu oggi lu dimaniu furistali di lu Statu nta la Riggioni; li mineri, li cavi e turbieri, quannu la dispunibbilità veni livata a lu patruni di lu funnu; li cosi di ntiressi stòricu, archiulòggicu, palitnulòggicu, paliontulòggicu ed artìsticu, di cuegghè e di comu egghè attruvati nta lu suttaterra riggiunali; li difici distinati a sedi di uffici pùbbrici di la Riggioni cu li sò arredi e l’àutri beni distinati a nu pùbbricu sirvizziu di la Riggioni.

ARTÌCULU 34

Li beni mmòbbili ca s’attròvanu nta la Riggioni e ca nun sunnu ‘n pruprità di nuddu , ci attòccanu a lu patrimoniu di la Riggioni.

ARTÌCULU 35

Li mpegni ca sunnu di prima pigghiati di lu Statu versu li enti rigggiunali vènunu mantinuti cu adiguamentu a lu valuri di la munita a l'èbbica di lu pajamentu.

ARTÌCULU 36

A lu fabbisognu finanziariu di la Riggioni si pruvveti cu li rèdditi patrimuniali di la Riggioni pi mezzu di tribbuti, dilibbirati di idda stissa. Sunnu pirò arrisirvati a lu Statu li mposti di pruduzzioni e li trasuti nta li monupoli di li tabacchi e di lu lottu.

ARTÌCULU 37

Pi li mprisi nnustriali e cummirciali, ca hannu la sedi cintrali fora di lu tirritoriu di la Riggioni, ma ca nta idda hannu stabbilimenti e mpianti, nta l'accirtamentu di li rèdditi veni ditirminata la quota di lu rèdditu ca s'hà attribbuiri a li stabbilimenti e li mpianti stissi. La mposta rilativa a ssa quota cumpeti a la Riggioni e è riscussa di l'òrgani di riscussioni di idda stissa.

ARTÌCULU 38

Lu Statu assigna ogni annu a la Riggioni, pi sulidariità nazziunali, na summa , di spènnirri , ‘n basi a nu pianu ecunòmicu, nta li pùbbrici travagghi . Cu sta summa si cerca di bilanciari lu minuri ammuntari di li rèdditi di travagghiu nta la Riggioni ‘n cunfruntu di la media nazziunali. Ogni cincu anni veni fatta la rivisioni di la summa assignata cu rifirimentu a li variazzioni di li dati assunti pi lu còmputu pricidenti.

ARTÌCULU 39

Lu riggimi duganali di la Riggioni è di ùnica cumpitenza di lu Statu. Li tariffi duganali, pi quantu ntiressa la Riggioni e rilativamenti a li lìmiti màssimi, vènunu stabbiliti doppu cunzultazzioni di lu Cuvernu riggionali. Sunnu asenti di ogni dazziu duganali li màchini e li strumenti di travagghiu acrìculu, e macari lu machinariu cullicatu a la trasfurmazzioni nnustriali di li prudotti acrìculi di la Riggioni.

ARTÌCULU 40

Li dispusizzioni ginirali supra lu cuntrollu valutariu emanati di lu Statu sunnu ‘n viguri macari nta la Riggioni. È pirò stituita nta lu Bancu di Sicilia, finu a quannu arresta lu riggimi vinculìsticu supra a li valuti, na Càmira di cumpinzazzioni a lu scopu di distinari a li bisogni di la Riggioni li valuti èstiri pruvinenti di li espurtazzioni siciliani, di li rimessi di l’emicranti, di lu turìsimu e di lu ricavu di li noli di navi scritti nta li cumpartimenti siciliani.

ARTÌCULU 41

Lu Cuvernu di la Riggioni havi facurtà di emèttiri prèstiti nterni.

DISPUSIZZIONI TRANSITORI. ARTÌCULU 42

L'Àutu Cummissariu e la Cunsulta riggiunali di la Sicilia, cumpresi li tecnici, arrestanu ‘n càrica cu li stissi funzioni finu a la prima alizzioni di l'Assimbrea riggiunali, ca si fa, a cura di lu Cuvernu di lu Statu, intra tri misi di l'appruvazzioni di lu prisenti statutu, ‘n basi a la emananda liggi alitturali pulìtica di lu Statu. Li circuscrizzioni di li culleggi alitturali sunnu, pirò, ditirminati ‘n nùmmira di novi, ‘n currispunnenza a li attuali circuscrizzioni pruvinciali, e spartennu lu nùmmiru di li Diputati ‘n basi a la pupulazzioni di ogni circuscrizzioni.

ARTÌCULU 43

Na Cummissioni paritètica di quattru membri numinati di l'Àutu Cummissariu di la Sicilia e di lu Cuvernu di lu Statu, ditirminerà li normi transitori rilativi a lu passaggiu di l’ uffici e di lu pirsunali di lu Statu a la Riggioni, ortri li normi pi l'attuazzioni di lu prisenti statutu.