Kunsertu
Li Kunsertu sunnu nu gruppu musicali sicilianu attivu dâ fini di l'anni uttanta ô 1994. Li cumpunenti dû gruppu sunnu catanisi missinisi e Palistinisi.
Biografìa
Lu gruppu nasci a Missina nta l'annu 1979. e junci un nutèvuli successu a liveddu nazziunali già dû primu album, "Shams", arriggistratu a Gènuva e Catania e pubbricatu ntô 1989 pi la New Tone Records.
Lu sò gèniri musicali, di iddi difinutu comu "sbrong", è nnâ rialità n'ammiscata di rock, world music (Sicilia, Maghreb e Sardigna, a cui si jùncinu nflussi pruvinenti di l'Àfrica nìura), funk, etnorock, pop.
Sunnu un gruppu famusu suprattuttu pì la canzuna Mokarta ma la granni apirtura di linguaggiu musicali dû travagghiu dî "Kunsertu" veni dâ prisenza ntô gruppu dâ vuci di Faisal Taher, cantanti palistinisi troppu mpurtanti pû gruppu. L'ammiscata di ritmi uccidintali e miludìi urintali, di sicilianu e di palistinisi, di rock e cantu àrabbu, fannu nèsciri na mùsica ùnica pâ quali la crìtica si sfurzau di parrari di etnorock, etnofunk, tribal-dance, circannu di cuntèniri ntra na difinizzioni lu stili di stu gruppu.
E' funnamintali l'apportu dî dui vuci leader, Pippo Barrile (missinisi) e Faisal Taher (palistinisi), nun sulu pi li sò qualitati tìmbrichi e milòdichi, ma midemma pi li pussibbilitati di splurazzioni musicali offerti di l'aviri a dispusizzioni na vuci mediuurintali e putìrila ntrizzari cu una occidintali.
Li testi, scritti di Maurizio "Nello" Mastroeni e arranciati dî Kunsertu, affrùntanu spissu timàtichi ligati a l'attualitati, dî straggi nta li campi pròfughi palistinisi a lu dramma di l'emicrazzioni, ma nun disdègnanu ntermenzi liggeri e rumàntici (la sò "Mokarta" havi oramai trasutu tra li clàssici).
Doppu la pubbricazzioni di lu sò terzu travagghiu ("Fannan", 1994), lu gruppu s'havi sciotu.
Dî sò cìnniri, ntô 1996, nasceru li "Dounia".
Cumpunenti dû gruppu
- Pippo Barrile (vuci)
- Giacomo Farina (pircussioni, tammureddu, urganettu diatònicu, backvocal)
- Stefano Foresta (sax, fràutu, friscalettu, backvocal)
- Vincenzo Gangi (bassu, backvocal)
- Maurizio "Nello" Mastroeni (chitarra alèttrica e acùstica, backvocal)
- Faisal Taher (vuci àrabba)
Àutri musicisti
- Tino Finocchiaro (tasteri)
- Giorgio Di Bella (battarìa)
- Arturo Terranova (battarìa)
- Tonino Miano (tasteri)
- Saro Sorrenti (trumma)
- Arturo Ferrante (sax)
- Massimo De Domenico (trummuni)
- Egidio La Gioia (backvocal)
- Rossana Maccaus (backvocal)
- Gaetano D'Angelo (sax)
- Addoullaye Diop (djembe)
- Gilvain Gomis (backvocal)
- Corrado "Dado" Sezzi (tabla)
- Adjasy (backvocal)
- Pape Mamadou Thiam (backvocal)
- Licia Mazzamuto (backvocal)
Discugrafìa
- 1994 - Fannan. Cu na canzuna 'n sicilianu: Mokarta.
- 1992 - Zambra. Cu na canzuna 'n sicilianu: Girannu pa città.
- 1989 - Shams
- 1984 - Kunsertu