Eutichio Ajello

Eutichio Ajello, (Missina, 1711 - Barcellona Pozzo di Gotto, 1793), diacunu, abbati, cunsigghieri di statu, bibliotecaru, catalugaturi, antiquariu sicilianu dû XVIII seculu.

Biografìa

Eutichio Ajello y Lascaris^[1] nasciu prubabbilmenti a Missina, comu iḍḍu stissu scrivi 'ntâ 'nâ littra a Ludovico Antonio Muratori (Modena, 1672-1750), ma studiò sicuramenti 'ntô munasteru di Santa Maria di Gala dill'Ordini basilianu, 'stituzzioni riliggiusa ubbicata 'ntâ l'omonima frazzioni cuḍḍinari di Barcillona.

Addivinutu diacunu 'ntô munasteru di San Micheli di Sant'Angelo, poi abbati dû munasteru dû Santissimu Salvaturi di Missina, notu 'ppî virtù cristiani e 'ppî sô cunuscenzi 'ntâ tutti i campi disciplinari, apprufunniu i già ricchi studi classici e dispuniu 'nâ nova cumpilazzioni dû catalugu dî codici greci, sarbati 'ntâ bibbliuteca di 'ḍḍû cenobbiu. Fù elettu visitaturi pruvinciali, prucuraturi ginirali e 'nfini diffinituri ginirali dill'Ordini di San Basiliu.^[2]

Pirsunaggiu ecletticu, riligiusu 'ngignusu, si distinguiu comu abbati,^[1]^[2]^[3] filosufu e teolugu, espertu in eluquenza e duttrina,^[3] studiusu d'arti e di scienzi, bibbliutecariu e antiquariu, suggiornau 'ntê principali citàti di Francia, Girmania, Nglaterra e Paisi Vasci, ristannu quasi scunusciutu in Italia.

Scarni e scarsi i ducumenti 'n patria, cuntrariamenti nummirusi l'attestazzioni e i riferimenti, speci 'n campu artisticu comu catalogaturi duranti û longu soggiornu ibbericu a serviziu pressu i Burbona di Spagna.

Pirìudu spagnolu

'Ntô 1743, 'ppî vuliri di Elisabetta Farnese,^[1] mugghieri di Fulippo V, andò 'ntâ Spagna appressu â sposa^[1] di Stefano Reggio, principi di Jaci, ambasciaturi dû regnu napulitanu a Madrid. Duranti û soggiornu 'ntâ capitali pressu â corti fu numinatu bibbliuticariu e antiquariu, e subbitu dopu assumiu â carica di consigghieri di statu.

Travagghiò 'ppî novi anni 'ntâ Bibbliuteca e 'ntô Museu^[1] dû Palazzu Riali de La Granja de San Ildefonso (edificiu 'ccû pruspettu pruggittatu dall'autru sicilianu Filippu Juvarra), 'nâ citàdina 'ntâ pruvincia di Segovia, a nord di Madrid, ô sirvizziu di una dî 'cchiù putenti riggini dill'epuca e dû figghiu don Luigi Antonio di Burboni chi û numinò sô tiologu e cunsultori di cammara fino ô 1752, annu in cui turnò in Italia.

Isabella Farnese û ricompinsò 'ccû un pitturali e un aneḍḍu «di zaffiri e diamanti, in cunsiderazzioni dû travagghiu fattu 'ppâ discrizzioni dî statui dû Riali Palazzu».

Pirìudu francisi

Aggrigatu comu dutturi di filusufia all'università Sorbona di Pariggi,^[3] 'ppî sô preggi e 'ppâ sô cunuscenza, 'ntrasìu in cunfidenza 'ccû tutti i 'cchiù illustri omini e pinzaturi 'nglisi e cun chiḍḍi chi pripararunu â rivoluzzioni francisi.

Pirìudu 'nglisi

A Londra fu aggrigatu â 'na non megghiu pricisata Accademia comu membru e maestru apprizzatu da 'na circhia di eminenti 'ntillittuali.

Pirìudu napulitanu

'Ntô 1792 si spustò a Napuli unni pubblicò ormai 'nzianu opusculi sutta mutivazzioni e prissioni dill'amici,^[3] attività chi finanziò prubabbilmenti vindendu i giuielli 'rrialati dâ suvrana Isabella. Fu numinatu abbati ginirali dill'Ordini basilianu.

Pirìudu sicilianu

Turnatu 'n Sicilia comu abbati perpetuu si didicò â cunduzzioni e dirizzioni dû munasteru di Gala, unni ristò finu â morti.

Finu all'emanazzioni dî liggi eversivi 'ntô novu munasteru dî basiliani di cuntrada Fai, quatteri 'Mmaculata di Barcillona, esistia un sô ritrattu, oggi datu 'ppi dispersu 'ccû spogghiu dî strutturi dill'istituzzioni dopu û fuzzatu abbandunu ô seguitu dâ supprissiuni dû 1865 dill'ordini riliggiusi. Û dipintu avia â siguenti iscrizzioni:
« "Ill. mus et rev. P. S. T. M. D. Eutychius Ajello Dr. Sorbonicus, socius anglicanus antiquarius, Pr. mus theologus et consilus S. R. M. Regius pensionatus Huius coenobii abbas perpetuus et universi nostri ordinis generalis" ».

Òpiri

Òpiri filosoficu - duttrinali

"Horologium Ecclesiasticarum Horarum Volumen", Roma, 1772.

Òpiri scientifichi

"Saggio d'istituzioni d'agricoltura", Napoli, 1782. (L'òpira è stata attribbuita 'ppi sbagghiu a Eutichio Ajello dall'OPAC 'ccu fundamenti tratti dû Dizionario di opere anonime e pseudonime di Gaetano Melzi, Milano, 1786-1851).

Dui vulumi in tri tumi, sarbati 'ntâ bibblioteca cumunali di Barcillona raggruppunu:

"Analisi delle facoltà scientifiche e modo di studiarle" (Metodo come debbano studiarsi le scienze),^[2]^[3] Tomo I.
"Analisi dell'uomo sopra i punti principali che allo stesso appartengono" (Stato dell'uomo),^[3] Tomo II.
"Analisi della storia arcana della natura",^[3] Tomo III (Napoli, presso Vincenzo Manfredini, 1792).

Manuscritti e catalughi opiri d'arti

Assulvendu l'incaricu reggiu, l'abbati cumpletò û manuscrittu (dinuminatu 'n tempi muderni Quadernu d'Ajello), appunti dapprima dati 'ppi persi, dopu in parti rinvinuti 'ntâ l'archivi ducumentali dû Museu dû Prado. Quadernu cumpostu di 224 paggini scritti in italianu, raggruppa 23 dissertazzioni, con 44 disignia di Juan Bernabè Palomino, 'llustranti a sessantina d'opiri di scultura dâ galleria dû Real Sitio de San Ildefonso. Veru e propriu catalugu d'arti che tanti studiusi hannu utilizzatu e muntuvatu 'ntê bibliografìi dî loru opiri e catalughi.

Û manuscrittu nascìu duranti a sistemazzioni dâ galleria d'arti di San Ildefonso, completatu 'ntô 1751, cumprindenti 'na raccolta di sculturi cullizzionata a pattiri dû 1728 ô 1746, annu di morti dâ riggina.^[1] Assai l'opiri italiani cuntimplati, fruttu d'accurpamenti di 'cchiù cullizzioni (tra chisti chiḍḍa dâ riggina Cristina di Svezia accumulata duranti i soggiorni e a permanenza a Roma, frazziunata e svennuta dopo picca e subbitanei passaggi d'eredità causa a morti dâ suvrana, e û ciclu dî musi accattatu dai riali e pruvinenti da Villa Adriana. Tutta la galleria confluiu 'ntô tempu ô Museu dû Prado di Madrid.

" "El Cuaderno de Ajello" y las Esculturas del Museo del Prado ", Catalogo della Mostra, Madrid 19 ottobre 1998 - 3 gennaio 1999.^[4]

'Ntô 2006 û Museu pruvvidiu â pubblicazzioni dû catalugu manuscrittu d'Ajello dû titulu "Saggio del Primo Tomo […] Descrizione [della] Celebre Real Galleria di San Ydelfonso", curato da S. Schroder e Miguel Ángel Elvira Barba.

Dû quadernu esistunu dicini di edizzioni, riedizzioni e traduzzioni chi 'nni fannu l'opira 'cchiù cunusciuta dill'Ajello. 'Ppi contru puru tutti l'autri opiri sunu citati 'ntê catalughi 'cchiù 'mpurtanti finu ô XX seculu.

Noti

1 2 3 4 5 6 Marco Buonocore, op. cit., p. 235 .
1 2 3 Giuseppe Emanuele Ortolani, op. cit., p. 90 .
1 2 3 4 5 6 7 Di Giovanni E. di Blasi e Gambacorta, op. cit., p. 494 .
↑ José Beltrán Fortes, Xavier Dupre, "Illuminismo e ilustración: le antichità e i loro protagonisti in Spagna e in Italia nel XVIII secolo , «L'Erma» di Bretschneider, Roma, 2003. ISBN 88-8265-243-2

Bibliugrafia

.
. 88-7062-943-0
. 88-95652-16-9
.
Carlo Santacolomba, "Riflessioni accademiche dopo i funerali dell'illustrissimo, e reverendissimo p. abate d. Eutichio Ajello...", Messina, presso i fratelli del Nobolo impressori arcivescovili, 1793.
(ES) Stephan F. Schröder, Miguel Angel Elvira Barba, "Eutichio Ajello (1711-1793) y su Descripción de la célebre Real Galería de San Ildefonso", Boletín del Museo del Prado, ISSN 0210-8143, Vol. 24, Nº. 42, 2006, págs. 40-88, Idioma: español.
(ES) Miguel Ángel Elvira Barba, "Las esculturas de Cristina de Suecia: un tesoro de la Corona de España" , Madrid, 2011.
"Il monaco basiliano Eutichio Ajello e il barone Francesco Anca", Domenico Ligresti.

Talìa puru

Commons

Lu Wikimedia Commons havi 'na catigurìa cca conteni media su Eutichio Ajello

Illustrazioni del Quaderno d'Ajello:

[Marco_Buonocore-235-1] 1 2 3 4 5 6 Marco Buonocore, op. cit., p. 235 .

[Giuseppe_Emanuele_Ortolani-90-2] 1 2 3 Giuseppe Emanuele Ortolani, op. cit., p. 90 .

[Di_Giovanni_E._di_Blasi_e_Gambacorta-494-3] 1 2 3 4 5 6 7 Di Giovanni E. di Blasi e Gambacorta, op. cit., p. 494 .

[4] José Beltrán Fortes, Xavier Dupre, "Illuminismo e ilustración: le antichità e i loro protagonisti in Spagna e in Italia nel XVIII secolo , «L'Erma» di Bretschneider, Roma, 2003. ISBN 88-8265-243-2

[1]

[2]

[3]

[4]