Anidridi carbònica

Li liami di l'âtomi di carbòniu e ussìgginu ntâ mulècula di anidridi carbònica.

Definizioni e Giomitria moleculari

L'anidridi carbònica (biòssidu di carboniu, pâ IUPAC) é nu cumpostu sèmplici dû carbòniu e pirciò fa parti di la chìmica nurgànica. Havi fòrmula CO₂ e esti furmata d'un àtumu di carbòniu (sìmbulu chìmicu C) e di dui àtumi di ossìggenu (sìmbulu chìmicu O). La sô struttura si po' rapprisintari, semplicimenti, di sta manera: O=C=O (l'àtumu centrali di carbòniu havi dui duppi liami cu l'àtumi d'ossìggenu e la mulècula mustra na giomitrìa chiatta). Si usa lu tèrmini anidridi pirchì riaggennu cu l'acqua si forma àcitu (àcitu carbònicu).

CO₂ + H₂O = H₂CO₃ (reazioni d'equilibbriu).

Propriità

L'anidridi carbònica veni pruduciuta, in gèniri, duranti lu finòminu di la cumbustioni, tramiti la firmentazzioni di lìquidi oppuru attraversu la respirazzioni di li criaturi viventi. La CO₂ pò èssiri chiamata macari biòssidu di carbòniu e esti un gassi senza culuri, senza nuddu ciàuru e pisa chiossai di l'aria (densità = 1.52). Diventa sòlidu à -78.5 °C (si chiama, a sta timpiratura, ghiacciu siccu o nivi carbònica). Rapprisenta unu dî chiù mpurtanti gassi a effettu serra e la sô cuncentrazzioni nta l'atmosfera aumenta a tali puntu ca purrìa nfluinzari lu clima di la terra.