Storia dâ lingua siciliana

Dâ Wikipedia, la nciclupidìa lìbbira.
« Nun si pò truvari na lingua ca pò diri tuttu senza aviri accattatu di l’àutri lingui. »

Comu lu talianu, la lingua siciliana è dirivata di lu latinu. Tutti dui sunnu lingui variamenti articulati. La lingua taliana è una di li tanti lingui parrati nta la pinìsula, sunnu tutti dui liggìttimi pi nàscita e pi sbiluppu, e ca funziònanu lu stissu nta la manera di l'usari. Comu lu talianu, chiddu chi quarchi vota veni chiamatu dialettu sicilianu rifretti li tradizzioni e curturi nòbbili; pussèdinu nu lèssicu e na granmmàtica, ma cci sunnu sempri certi diffirenzi. Nginirali lu "dialettu" veni usatu nta na zona cchiù nica rispettu a la lingua, ca pari mmeci di èssiri canusciuta nta na aria cchiù granni.

Na storia pi certi versi parallela a chidda di lu talianu[cancia | cancia la surgenti]

La spanzioni di na lingua parrata supra na certa aria giugràfica cchiù anchia havi sti cunziguenzi: lu fattu ca sta lingua addivintata lu menzu di cumunicazzioni di la parti duminanti, pot'èssiri scritta di li littirati, di l’òrgani di l’amministrazzioni di la pirifirìa e di lu putiri cintrali; la circustanza ca cerca di èssiri rigulata dànnusi na “liggi” stabbiluta di li grammàtici e èssiri nzignata nta li scoli; tutti sti cosi nun fannu àutru chi diffirinziari la lingua di lu dialettu. Lu tèrmini dialettu, di lu grecu dialectos (lingua) di lu verbu dialegomein (parrari) faci vìdiri dui rialitati diversi:

  1. Nu sistema linguìsticu autònumu rispettu a la lingua nazziunali, pirciò nu sistema ca havi caràttari strutturali e na storia distanti di chiddi di la lingua nazziunali;
  2. Na variatati parrata di la lingua nazziunali, voli dìciri na variatati di lu stissu sistema e di caràttari strutturali di la lingua nazziunali.

Lu dialettu addiventa menzu di ntirpritazzioni e di sprissioni idintificànnusi cu la lingua di l'affettu e di lu sintimentu, ca nun si metti pi nenti contra a la lingua taliana, ma nni faci, piccontra unu di l’aspetti ca cuntribbuisci a fàciri la lingua nazziunali. Lu dialettu esti sprissioni di l’arma di lu pòpulu e comu tali havi a èssiri riscupertu, rivalutatu e valurizzatu, màssimu ora ca stamu assistennu a na mudirnazzazzioni di la lingua, a causa di cui si stannu pirdennu assai sprissioni dialittali, veru tìpici e carattarìstichi ca na vota èranu sempri usati. Lu studiu di lu dialettu sicilianu nni porta a circari l’òriggini di la lingua e di l’infrussi chi hirìu nta lu tempu. Na ricerca stòrica brevi rivela la sò singularitati e la sò natura di tanti curturi.

La parrata siciliana attraversu li sèculi[cancia | cancia la surgenti]

Li pòpuli diffirenti ca nta l’ùrtimi 2500 anni passaru nta la Sicilia, lassaru nu marcu ncancillàbbili nta la lingua e la curtura siciliana. La parrata siciliana nun havi a èssiri cunziddirata comu un dialettu, ma comu lingua a tìtulu chinu, pi dui raciuni: nascìu cu lu pòpulu sicilianu, e arristau ntatta nta li sò carattarìstichi duranti li sèculi e havi la sò grammàtica e lu sò vucabbulariu. La lingua siciliana, ca midemma òi si scrivi e si parra, esti pibberu la lingua di l’abburìggini siciliani. Sti abburìggini sunnu li Sìculi ca vìnniru di lu Lazziu e li Sicani ca vìnniru di la pinìsula Ibèrica e di l’Africa, ca ncuntrànnusi nta la Sicilia, ammiscaru li dui modi di vita e di lingua. Nun nn’hamu a scurdari l’Elimi, nu pòpulu pacìficu di pastura di ncerta pruvinenza.

Accuminzannu di l’VIII sèculu a.C., la Sicilia fu suttamisa di na fudda di migranti cu lingui diffirenti: greci, finici, cartagginisi, rumani, unni, vantali girmànici, goti di la Sbezzia, àrabbi, nurmanni, sbevi, e poi l’angiuvini, l’aragunisi, li spagnoli, li savoia, l’austriachi, li burbuna e li ngrisi. Avissi a èssiri fàcili capiri nta quali misura, cu tutti sti nfrussi, la lingua siciliana s'avissi pututu sbiluppari agghicannu a èssiri chidda ca si parra e si scrivi òi. Lu latinu si ntrasìu assai supra li variazzioni di li parrati siciliani, macari siddu lu grecu era cchiù diffusu di dui sèculi prima di la cunchista rumana. Cu li diffirenti accupazzioni l’usi e li custumi di li siciliani canciaru, ma la lingua nun canciau nta la sò ntiritati, anzi s’arricchìu pi l’assimilazzioni di na nfinitati di vucàbbuli dirivati di tanti lingui aurupei, urintali e africani ca traseru nta l’idioma sicilianu. Di lingua sìmprici parrata, lu sicilianu accuminzau a èssiri scrittu e a tràsiri nta l’atti nutarili e nta li ducumenti ufficiali versu l’annu 1090.

Fidiricu II di Hohenstaufen, niputi di Varvarussa, vinni accramatu re di Sicilia ancora picciutteddu. Siccomu fu struiutu chiossai nta la Sicilia, stintivamenti pigghiau lu sicilianu comu lingua nazziunali. Macari siddu iddu parrava na lingua francu-nurmanna (e midemma l'alimagnu di sò patri), vosi ca la littiratura scritta e la lingua puiètica fùssiru rapprisintati nta lu sicilianu, picchì ancora nun asistìanu òpiri littirari e trattati di scenza scritti supra carta. Nta ddu piriudu li siciliani fìciru maravigghiari usannu la carta a locu di la pirgamena e midemma tannu la lingua parrata o scritta nun era tantu diffirenti di chidda di òi.

Nta stu ammienti di littiraria vivu, ammeri l’annu 1230 nascìu la lìrica puiètica taliana vurgari. L’autura, attaccati a la liggi jurìdica e amminastrativa di lu regnu miridiunali, traprantaru nta lu sicilianu vurgari li scempri di la lìrica puiètica pruvinzali, a lu scopu di nàsciri na lingua littiraria capaci di pruittari, lu pristìu di la curti firidiciana. Accussì sta lingua accuminzau a si mpuniri, cu la grammàtica, la sò sintassi e la ricchizza di li sò vucàbbuli putenti nta la sprissioni, a l’attinzioni di lu munnu curturali.

A pàrtiri di lu 1250, cu la morti di Fidiricu II e lu sfasciamentu di la curti, la ridditati di la scola siciliana fu pigghiata di la Talia di lu sittintriuni, spiciali di la Tuscana, unni si furmau na currenti di puieti, li “sìculu-tuscani”, ca nzècutu dèsiru urìggini a la scola di lu “dolce stil nuovo” e a la lingua taliana ca si affirmau comu lingua di lu pòpulu talianu, a lu cuntrariu di lu sicilianu ca vinni digradatu a lu rolu di sìmprici dialettu riggiunali. Li puieti nun èranu cchiù urigginari di l’ìsula e la Tuscana aridditau di la Sicilia lu tìtulu di centru criativu di la littiratura taliana. Cu tuttu chissu, Petrarca e Dante Alighieri midemma ammìsiru la discinnenza di la lingua pupulari siciliana comu prima lingua littiraria taliana. Nu fattu assai mpurtanti di pricisari esti ca mentri la lingua e la littiratura taliana si stàvanu furmannu, lu sicilianu appi nu veru granni nfrussu nta dda lingua.