Ricotta salata

Dâ Wikipedia, la nciclupidìa lìbbira.

La ricotta salata è un prudottu tìpicu dô miridioni talianu, arrivata câ culunizzazioni greca. Veni assai cunzumata particularmenti ntâ pruvincia di Catania, unni è ndispinzabbili, misa ô postu dû furmaggiu grattuggiatu, pi cunniri la famusa pasta a la norma, piattu tìpicu dô catanisi.

La ricotta salata veni fatta secunnu lu nurmali prucessu di pruduzzioni dâ ricotta tradizziunali, ma anveci di èssiri misa 'n cummerciu frisca, veni salata a siccu 'n supirfici e misa a staggiunari pu nu pirìudu tra deci jorna e nu misi.
Nta ssu pirìudu la ricotta perdi lu 50% d'acqua; cu ssu prucidimentu si manteni bona, macari pi diversi simani, grazzi a la picca umidità e ô sali ca havi pi sò natura n'effettu cunzirvanti.

Pruduzzioni[cancia | cancia la surgenti]

Lu seru dô latti di pècura o capra veni purtatu a 65 gradi, veni junciuta una quantità di latti dô 10% e tuttu veni quadiatu a 80-90 gradi, timpiratura unni cuàculanu li prutiini dô seru e la ricotta veni a galla a furma di fiocchi.
La ricotta veni traspirita ntê fasceddi e veni fatta spurgari pi 24 uri a timpiratura nurmali, dopu veni salata a siccu e misa a staggiunari.