Primavera narisi

U carrettu sicilianu ca vincì a prima edizioni dâ primavera narisi (allura ancora sagra dû miennulu 'n ciuri) a Naru ntô 1934.

A Primavera narisi è nna festa popolari ca si svolgi a Naru (AG) u jornu duoppu a fini dâ sagra dû miennulu 'n ciuri di Girgenti, pi ricurdari u fattu ca st'ultima festa avi origini narisi in quantu fu ammintata d'un narisi, u conti Fonziu Gaetani ntô 1934 e cilibrata propriu a Naru finu au 1937 quannu fu purtata a Girgenti. A primavera narisi pigghianu parti gruppi locali e gruppi internazzionali ca viennu dâ sagra di Girgenti. A festa si svolgi luongu tutta a jurnata ancuminciannu dâ matina quannu c'è a sfilata dî gruppi pî principali strati dû paisi; u pomeriggiu, finu a sira, i gruppi si esibiscinu 'ncapu u parcu muntatu nna chiazza Garibbaldi. A fini dâ jurnata viennu assignati i premi, tra i quali i cchiù 'mportanti su u titulu di miss primavera assignatu a picciotta cchiù beddra di tutta a manifestazioni e u premiu Aura Fenice assignatu au megliu gruppu.