Naduri

Dâ Wikipedia, la nciclupidìa lìbbira.
(Rinnirizzata di Naduri (CL))
Naduri
Bompensiere-Stemma.png
Muttu:  
Nomu ufficiali: Bompensiere
Pruvincia: Caltanissetta
Superfici: 19 km²
Abbitanti: 676
Dinzitati: 36 ab./km²
Cumuni cunfinanti: Milocca, Muntidoru, Mussumeli, Racalmutu, Sutera
CAP: 93010
Prifissu telefònicu: 0934
Situ ufficiali: http://www.comunebompensiere.it/
Lu cumuni di Naduri

Naduri (o Bompinzeri nta àutri parrati siciliani) è un cumuni di 676 abbitanti dâ pruvincia di Caltanissetta.

Giografìa[cancia | cancia la surgenti]

Lu sò tirritoriu è quasi ô centru dâ Sicilia nta n’ària cullinari posta a n'autizza media supra lu liveddu dû mari di 290 metri, rilivàbbili supra la carta d'Italia, fogghiu 267 urientamentu II N.O. "Muntidoru", di latitùtini Nord circa 37°28'30", mentri di luncitùtini Est 13°46'20". S’appoggia supra nu virsanti dû munti Marrobbiu allungànnusi di Sud-Est a Nord-Ovest pi na lunghizza di circa un chilòmitru. Ussirvànnulu prucidennu di Milocca appari comu “vecchiu addurmisciutu”. È dispostu supra n'ùnica via principali e ntâ sò lati s’artìculanu li casi, quasi uniformimenti distribbuuti. Lu puntu cchiù vasciu dû centru abbitatu s’attrova a Nord-Ovest, a na quota autimètrica di circa 270 metri supra lu liveddu dû mari (Chiana Giarri), lu puntu cchiù àutu s’attrova a Sud-Est a na quota di circa 320 metri supra lu liveddu dû mari (Cuntrata Purtedda). Lu tirritoriu si sgruppa n furma cchiù o menu triangulari cu basi a Sud e cima a Nord. Lu puntu cchiù àutu n quota dû sò tirritoriu e lu cozzu Don Filippu a quota 585 supra lu liveddu dû mari, ntô sò cunfinari cu lu tirritoriu di Racarmutu, mentri lu puntu cchiù vasciu s’attrova a Nord ntâ cunfruenza dû turrenti Naduriciumi Gaddu D’Oru â quota di m 167 supra lu liveddu dû mari.

Ci sunnu tutta na seri di cullini rapprisintati a Nord dâ cuntrata Muntàutu, cuntrata Saja e Serra di Vacchi; a Est lu Munti Marrobbiu e a Sud lu Pizzu.