Muvumentu dî Furcuna
Lu muvumentu dî furcuna è lu muvumentu chi fu all'uriggini di na clamurusa prutesta ca bluccau la Sicilia tutta para tra lu 16 e lu 20 di jinnaru dû 2012. Partuta dî rivinnicazzioni di camiunisti, piscatura, massari e travagghiatura dê campagni, contra l'aumentu dû prezzu dâ binzina di 40% rispettu a n'annu prima, lu muvumentu appi l'adisioni di làrichi parti dâ pupulazzioni di l'ìsula, tra cui, cummircianti, studenti e disoccupati.
Una dî rivinnicazzioni supra cui si basa la prutesta è l'attuazzioni dû statutu di autunumìa dâ Riggiuni siciliana, e n particulari di l'articulu 37 ca assicurassi all'isula introiti fiscali chi pirmittissiru effittivamenti nu calu sustanziali dâ prissioni fiscali n Sicilia e na ridistribuzzioni cchiù làrica dî sordi ca vinissiru dî tassi ca li vari stabbilimenta pitruliferi forasteri nstallati n Sicilia avissiru a paiari.
Lu muvumentu dî furcuna arrinisciu a bluccari l'attivitati ecunòmica nti cintinara di lucalitati dâ Sicilia, cu n'adisioni â rivorta di quasi tutali. Puru pi chistu lu muvumentu s'addichiara privu di rifirenzi pulitichi e effittivamenti ntê curtei la sula bannera visìbbili era chidda dâ Sicilia.
L'abbinimenti dâ Sicilia foru sulu parziarmenti rinnuti pùbbrici ntê media nazziunali, ca foru accusati dî simpatizzanti dû muvumentu di cinsura. Lu muvumentu fu effittivamenti suttavalutatu. Fu puru accusatu dâ cunfinnustria siciliana di essiri pilutatu di pirsunaggi oscuri liati â destra (Forza nuova) oppuru dâ mafia. Nunustanti chistu lu muvumentu appi na certa rilivanza nazziunali cu cumitati ca si furmaru nti vari riggiuni italiani e manifistazzioni e blocchi di prutesta n vari parti dû cuntinenti, supratuttu nti l'Italia dû Sud e n Sardegna.
