Misstress Bàrbara

Dâ Wikipedia, la nciclupidìa lìbbira.
Misstress Bàrbara (2010)

Misstress Bàrbara (nomu veru Bàrbara Bonfiglio), nata ‘n Sicilia, ntôn paisi ê faldi di l'Etna, ntô 1975, è na Dee jay (Disc Jockey) canadisa d’orìggini taliani assai famusa. Veni cunziddirata comu la megghia Dj dû munnu.

Lu sò nomu “Misstress” si scrivi cu quattru S pirchì è nu jocu di palori (cumpostu dî dui palori ngrisi “miss” e “stress”). Attuarmenti idda campa a Montreal (ntâ Pruvincia francòfuna dû Québec, Canada) unni la sô famigghia s’havi trasfiruta quannu idda avìa sulu ottu anni.

A dòdici anni nizzia a sunari lu tammuru. Passa appoi â battarìa ntôn gruppu heavy metal, nun ammustrannu mmeci granni apprizzamentu pâ house music. Si ntiressa di mùsica alittrònica dû 1994, lu stissu annu dû sò baccalauriatu (baccilleratu francòfunu) ‘n cumunicazzioni (spicialitati cìnima). Accumenza a sunari ntê “clubs” dî citati canadisi di Québec, di Trois-Rivières e a Toronto (Pruvincia anglòfuna di l’Ontario, Canada), unni avìa, tra l'àutru, travagghiatu nta na videoteca e ntôn risturanti.

Havi cuntinuatu ntâ sò straurdinaria carrera sunannu nta quasi tuttu lu munnu (‘n Europa, Asia, Nord e Sud Mèrica e Australia) nzinu dû 1996 quannu tinni la sò prima sirata di Dj (Dee jay). La bedda bruna havi già rializzatu pruduzzioni supra arcuni dî megghî etichetti Techno dû munnu (Tronic, Rotation, Strive et In-Tec) e havi midemma avutu arcuni vrani musicali silizziunati pi film. Bona parti dî sò nfruenzi musicali sunnu Mùsica Latina e lu Jazz. Ma ntô 1999 Barbara havi criatu la sò propia etichetta, Relentless Music, c’havi addivinutu appoi Iturnem a lu nizziu dû 2004. Misstress Barbara havi sunatu nzèmmula a granni artisti comu Carl Cox, Björk e tanti àutri.

S’havi esibbutu nta “clubs” e “raves” nta tuttu lu munnu comu p’asempiu Aria (Montreal, Canada), Rex (Pariggi, Francia), Florida 135 (Fraga, Spagna), Velvet Underground (Londra, Regnu Unitu), Twilo (New York, Stati Uniti). Unu dî mumenti cchiù mpurtanti dâ sò carrera fu la sò esibbizzioni ô "Fashion Cares" a Toronto ‘n fauri dî vìttimi di l'AIDS. La musicista siciliana participau macari a arcuni àutri granni abbinimenti comu I LOVE TECHNO (Belgiu) e SONAR (Spagna).

Nfini è na figura mpurtanti di l'universu musicali mudernu, puru siddu ancora picca nota dî taliani. È comu è gghiè apprizzata e ricircata pî sò cumpitenzi chî piatti, sempri house e techno. Lu sò "hard beat" è tìpicu dî sò pruduzzioni.