Madonna (cantanti)

Dâ Wikipedia, la nciclupidìa lìbbira.

Madonna (Bay City, Stati Uniti, 1958) è la cchiù cèlibbri cantanti fìmmina dâ storia. Vinnìu 250 miliuni di dischi finu ô 2006, daccussì addivintau la cantanti fìmmina ca vinnìu cchiù dischi ntâ storia musicali. Accuminciau la carrera ufficiarmenti ntô 1982, cu l'album ca porta lu so nomu. La maggior parti dî canzuna si scrivìu idda stissa, mùsica e paroli. Ntô 1984 pubblicau l'album Like a virgin, ca addivintau un successu senza pricidenti. Di allura Madonna scrivi e pruduci li so canzuna in collabburazziuni cu àutri musicisti e prudutturi, però quasi tuttu lu travagghiu criativu e melòdicu è sempri lu so. Nta quasi 25 anni di carrera, Madonna affruntau cu sempri criscenti successu tutti l'espressioni musicali: soul, dance, disco, r'n'b, mùsica stili anni '40, musical, però la so mpronta è comunqui pop, nta l'accezzioni cchiù nòbbili d­û tèrmini: popular, capaci d'arrivari a tutti. Tra li so tanti album bisogna ricurdari macari True Blue (1986), Like a Prayer (1989), Erotica (1992), Bedtime Stories (1994), Ray of Light (1998), Music (2000), American Life (2003), Confessions on a Dance Floor (2005) e Hard Candy (2008). Tantu pi fari un esempiu, l'album Like A Prayer ricivìu la siguenti recensiuni ntâ pristiggiusa rivista Rolling Stones: "La musica pop nun arriniscìu mai prima di stu album di Madonna a avvicinàrisi accussì tantu a l'arti".

A parti la mùsica in sensu strittu, Madonna è la cchiù cèlibbri cantanti pi quantu riguarda li videu musicali. Dopu aviri sfidatu Michael Jackson nta l'inizzî di l'anni '80, â fini la so cuntinuità e la so capacità di rinnuvàrisi cuntinuamenti, la purtaru a vìnciri ogni cuncurrenza. Li so primati su mpressiunanti, daccussì comu li migghiara di premi ca vincìu, tra cui na quantità enormi di Video Music Awards e Grammy Awards, li màssimi ricanuscimenti musicali mundiali. Ntô 2005 fu numinata membru fundaturi onorariu dâ Music Hall Of Fame, nsemi cu li Beatles, Bob Marley, U2 e Elvis Presley. Chistu forsi è finora lu ricanuscimentu cchiù pristiggiusu ca Madonna ricivìu. Tra li so milli record, unu dî cchiù mpurtanti è ca idda piazzau lu numeru cchiù àutu di canzuni ntê classìfichi, supirannu giustu ntô 2006 li primati dî Beatles e di Elvis Presley, cu 60 canzuni di successu. E Madonna è ancora nnô megghiu dâ so carrera e quindi havi ancora tempu pi distanziàrisi ancora di cchiù di tutti l'àutri cantanti.

La so fama pî canzuna e li videu addiventa un tutt'unu ntê so' cuncerti, ca su un veru e propiu cundinzatu di sprissioni visuali, musicali e culturali dî nostri tempi. Lu so' primu tour mundiali fu lu Virgin Tour, ntô 1985, e l'ùrtimu fu lu Confessions Tour, ca finìu ntô Sittèmmiru dû 2006. Cu stu Tour, ca arriggistrau lu tuttu esauritu in tutti li cità unni passau (cumpresa Roma, unni 70.000 fans acclamaru la cantanti lu di 6 agustu) arriniscìu a bàttiri n'àutru record: lu tour di cchiù granni successu pi' na cantanti ntâ storia dâ mùsica, cu 200 miliuna di dòllari guadagnati. Oramai cunzidirata cchiù di na sèmplici cantanti, la cchiù famusa dâ storia, Madonna è, a quasi 50 anni, na icuna culturali "tutali", grazzî macari a li so' liami cû munnu di l'arti e dâ cumunicazzioni, e la so' capacità di criari sempri novi munni visuali e musicali.