Ci facisti nèsciri li pedi

Dâ Wikipedia, la nciclupidìa lìbbira.
(Rinnirizzata di Ci facisti nesciri i pedi)

La frasi "Ci facisti nèsciri li pedi" è na manèra di diri dû sicilianu, in usu ntô Catanisi, e si usa quannu quarcunu dici na smarfarata, na saggirazzioni.

L'uriggini[cancia | cancia la surgenti]

Lu dittu nni veni, pirò, di nu cuntu ca nun havi nenti a chi fari cu lu significatu ca acquistò appoi la frasi, ma, cumunqui, la storia ca si cunta accadìu nta na situazzioni di la rialtà di l’èbbica.

Anticamenti, prima ca si mintava lu frigurìfiru, li ghiacceri a Catania e nta pruvincia vinìanu carricati cu la nivi e cu lu jazzu di la Muntagna (l’Etna), ca macari ntâ stati havi caverni unni si manteni nivi e jazzu. La nivi vinìa usata, quannu c’era càudu, macari pi traspurtati nu mortu di nu paisi a n'àutru (s’iddu avìa murutu fora di lu sò paisi). Lu mortu vinìa traspurtatu cu nu carru e vinìa cummigghiatu tuttu paru cu la nivi.

Lu cuntu[cancia | cancia la surgenti]

Un jornu, nta la stati, ci fù nu mortu nta nu paisi ca avìa èssiri traspurtatu a Catania e lu figghiu ncarricò pi ssa mbascia chiddi ca facìanu ssu misteri. Pirò, succomu, stu figghiu era tanticchia avaru e tirò supra lu prezzu di lu sirvizziu, li traspurtatura, pi sparagnari, accattaru picca nivi. Camina, camina, la nivi ncuminciò a squagghiari e pirciò, si circava, a manu a manu, di sparpagghiàrila comu megghiu si putìa pi cupriri tuttu lu corpu. A li rimustranzi di lu figghiu, ca accumpagnava lu carru cu lu sò patri mortu e vidìa tuttu ssu malu travagghiu, li traspurtatura ci dicìanu sempri: “ vossia nun s’aviri a pruccupari … ca nuàtri sapemu lu misteri !”. Ma quannu la nivi nun ci bastò cchiù pi cummigghiari tuttu lu corpu e ristaru fora li pedi, lu figghiu gridò:

“ Ora, ci facìsturu nèsciri li pedi fora !!!”


Lingua Siciliana
Cosi di tutti jorna - Azzioni umani - Prufissioni - Sprissioni Tipici - Lingua Siciliana