Adam Mickiewicz

Dâ Wikipedia, la nciclupidìa lìbbira.
Adam Mickiewicz
U monumentu a Adam Mickiewicz a Gorzów Wielkopolski, Pulonia (Józef Gosławski, 1956)

Adam Mickiewicz (Zaosie, 24 di dicèmmiru 1798 - Custantinòpuli, 26 di nuvèmmiru 1855) è cunzidiratu lu cchiù illustri pueta pulaccu.

La vita[cancia | cancia la surgenti]

Nascìu lu 24 di dicèmmiru 1798 a Zaosie, nta li vicinanzi di Nowogródek, l'anticu Gran Ducatu di Lituania di na famigghia d'anticu lignaiu, ma caduta 'n ruvina. La sò furmazzioni curturali, mmivuta di clàssici, si jìu accumpritannu a l'Univirsitati di Vilnius di lu 1815 a lu 1819. Di lu 1819 a lu 1823 asircitau l'attivitati di prufissuri a Kowno.

Doppu èssirisi ntirissatu a li filòsufi francisi illuministi commu Voltaire, prestu accuminciau a appassiunàrisi a li caputravagghi di li granni scrittura rumàntici Schiller e Byron.

A Vilnius s'affiliau a na sucietati sigreta canusciuta cu lu nommu di "Filumati e Filareti". Fortimenti crìticu pi lu "paternu abbracciu" russu supra lu regnu pulaccu, nta li 1823 fu arristatu di la pulizzìa russa cu àutri accòliti di la setta. Fu mpriggiunatu pi arcuni misi e nun turnau mai cchiù nta li sò terri. Vissi quinni a Odessa, Mosca e San Pitroburgu, strincennu ligami cu nummurusi scrittura russi, tra cui Alexandr Pushkin.

L'òpiri[cancia | cancia la surgenti]

Commu pueta accuminciau a raccògghiri li primi successi cu l'òpira Ballady i romanse (Ballati e Rumanzi) di lu 1822 c'apri l'etati rumàntica nta la littiratura pulacca. La prifazzioni di l'òpira cunzisti nta na futugrafìa supra la littiratura di l'Europa occidintali.

Tra lu 1822 e lu 1832 accumpunìu l'òpira tiatrali Dziady (L'Avi), nta lu quali cunfirìu a la Pulonia nu rolu di guida pi l'àutri nazzioni Europei. Lu tìtulu di l'òpira addiriva di n'antica festa pupulari bielurussa, c'havi logu duranti la festa di Ognissanti; cilibbrazzioni a la quali Mickiewicz participava duranti la sò giuvinizza 'n Lituania. La secunna parti parra di li suffirenzi tirreni, raffigurannu fantasmi di nquilini maltrattati, bammini chi nun ponnu ragghiùnciri lu paradisu pirchì nun hannu suffertu supra la terra e cuntadini vìrgini chi nun hannu mai spirimintatu né l'amuri, né li sò suffirenzi. La terza parti addipinci lu martiriu di la Pulonia e prisenta na visioni di lu futuru di la nazzioni, nta la quali li suffirenzi sunnu paragunati a la Passioni di Cristu. Sta visioni si cuncludi cu la prufezzìa di nu mistiriusu missìa di la Pulonia di nommu "44". La quarta parti è nu munudramma. Lu prutagunista è lu spìritu di nu giùvani suicida, cunzumatu di la passioni chi lu havi purtatu a la fuddìa e appoi a la morti.

Duranti lu sò esiliu Mickiewicz havi scrittu tra l'àutri Konrad Wallenrod (1828), nu puema filusòficu c'havi ispiratu la giuvintù pulacca nta la lutta contra l'upprissioni. Nta l'òpira nu Maestru Lituanu di l'Òrdini Teutònicu addimulisci li sò attivitati.

Nta lu 1825 Mickiewicz si trova 'n Crimìa e pùbbrica lu sò travagghiu eròticu Sonety krymskie (Sunetti di Crimìa,1826). Sibbeni ispiratu dû panurama di la steppa, la sò ànima e la sò menti sunnu sempri cchiù assurbiti di li soi sintimenti nazziunalisti. Ma l'òpira, la cchiù mpurtanti pi li pulacchi è Pan Tadeusz (Signuri Taddìu) - un puema di 12 libbri, chiamata "epupeia nazziunali".

Adam Mickiewicz macari havi traduciutu 'n pulaccu l'òpiri d'autura taliani: Francesco Petrarca e Dante Alighieri.